सर्लाही–पूर्वपश्चिम लोकमार्गदेखि करिब दुई किलोमिटर दक्षिण वाग्मती नगरपालिका वडा नम्बर १२ मा निर्माणाधीन अवस्थामा रहेको बागमती फिचर फन ताल आन्तरिक तथा बाह्य पर्यटकको आकर्षणमा परेको छ । निर्माणाधीन अवस्थाको मानवनिर्मित बागमती फिचर फन तालमा घुम्न दैनिक १ हजारभन्दा बढी पर्यटक आउन थालेका छन् ।
करिब १२१ बिघा क्षेत्रफलमा निर्माणाधीन अवस्थामा रहेको बागमती फिचर फन ताल निर्माणकै चरणमा करिब ६० करोड रुपैयाँ खर्च भइसकेको नगरप्रमुख भरतकुमार थापाले जानकारी दिए । उनका अनुसार चुरेकै काखमा रहेको उक्त ताल हाल १० सिट क्षमताको छ मोटरबोट सञ्चालन भइरहेका छन् । निर्माण सम्पन्न भएपछि ३५ सिट क्षमता भएको जेटबोटसमेत सञ्चालन गरिनेछ ।
ताल पूर्ण निर्माण हुन करिब ६ महिना लाग्ने भए पनि तालको सुन्दर दृश्य, तालपारि देखिने चुरे पर्वत, तालमा पौडिँदै गरेका हाँस र गुडिरहेका मोटरबोटले आन्तरिक तथा बाह्य पर्यटकको मन लोभ्याएको छ । तालमा घुम्न आउने पर्यटकको चाप अहिले नै बढ्न थालिसकेको बागमती इन्टरटेन्डमेन्ड प्रालिले जनाएको छ ।
अहिले तालमा रहेका बोटमा यात्रा गर्ने तथा ताललाई नजिकैबाट नियाल्दै खाजा खाने, साथीभाइ भेट्ने तथा रमाइलो गर्ने र टिकटक बनाउने पर्यटकको संख्या बढिरहेको नगर उपप्रमुख लीलाकुमारी मोक्तानले बताइन् । उनका अनुसार सो ताललाई प्रदेश २ को पर्यटकीय गन्तव्यका रूपमा निर्माण गर्ने लक्ष्यका साथ नगरपालिकाले ताल निर्माणको काम गरिरहेको छ । तालमा दैनिक १ हजारभन्दा बढी आन्तरिक तथा बाह्य पर्यटक आउने गरेका नगरपालिकाले जनाएको छ ।
तालको नजिकै सुमेरु पर्वत, मिनिनेपाल र शिवमूर्ति बनाउने योजनाका साथ काम भइरहेको छ । तालको बीचमा रिसोर्ट निर्माणाधीन अवस्थामा छ भने तालको वरिपरि नगर बगैँचा तथा घेराबेराको काम पनि भइरहेको छ । तालमा घुम्न आउने आन्तरिक तथा बाह्य पर्यटकले २ सय रुपैयाँको टिकट काटिसकेपछि तालमा घुम्न थाल्दा आफूलाई पोखराको फेवाताल घुमेको महसुस भएको सुनाउने गरेका छन् ।
तालको सौन्दर्य बढाउन हाँसपालन, वरिपरि फूल लगाइएको र तालको बीचमा रिसोर्टसमेत निर्माण गरिएको छ । अबको करिब ६ महिनामा ताल निर्माण सम्पन्न गर्ने तयारीका साथ नगरपालिकाले काम गरिरहेको छ । पूर्ण रूपमा ताल निर्माण भई नसक्दै करिब १ हजार जनाले प्रत्यक्ष तथा अप्रत्यक्ष रूपमा रोजगारीसमेत पाएका छन् ।
ताल निर्माण सम्पन्न भएपछि नगरका करिब १ हजार ५०० स्थानीय युवाले रोजगारी पाउने र नगरको पनि आन्तरिक आयस्रोत बढाउने योजना रहेको प्रमुख प्रशासकीय अधिकृत विमलकुमार पोख्रेलले बताए ।
तालमा सजावट र रिसोर्टको काम तीव्र गतिमा भइरहेको छ । नेपालकै सबैभन्दा ठूलो मानवनिर्मित तालको सम्पूर्ण काम सकिएपछि दैनिक करिब ५ हजार आन्तरिक तथा बाह्य पर्यटक ल्याउने नगरपालिकाको लक्ष्य छ । तालको गहिराइ १५ देखि ४५ फिटसम्म गहिरो छ । जोखिम रहेकाले उक्त तालमा मानिसलाई पौडी खेल्न र माछा मार्न निषेध गरिएको छ ।
साथै, केही समयपछि उक्त तालमा माछापालन पनि गर्ने नगरपालिकाले योजना बनाएको छ । नगरपालिकाले नगर बगैँचा र फनपार्कसमेत निर्माण गरिरहेको छ । नगरबासीलाई रोजगारी पनि दिने र नगरको आन्तरिक आयस्रोत बढाउने लक्ष्यका साथ ताल, नगर बगैँचा र फनपार्क निर्माण भइरहेको नगरपालिकाले जनाएको छ ।
सडक निर्माण, स्तरोन्नति मात्र विकास नभई आन्तरिक आयस्रोत बढाउने र रोजगारी सिर्जना गरी स्वरोजगार बनाउने योजना ल्याउनु नै विकास रहेको नगरका जनप्रतिनिधिको निष्कर्ष छ । यसले नगरको आन्तरिक आयस्रोत बढाउन र बेरोजगार नागरिकलाई रोजगारी सिर्जना गर्ने काम गरिएको जनप्रतिनिधि बताउँछन् ।