चितवन। चितवनको भरतपुर महानगरपालिकाले मापदण्ड विपरीत बनेका घर संरचनाहरु भत्काउन ३५ दिने सूचना जारी गरेको छ । 

महानगरपालिकाले मंगलबार सूचना जारी गर्दै नगर क्षेत्रभित्र प्रचलित मापदण्डअनुसार नक्सा पास नगरी बनेका घर, अस्थायी टहरा, पर्खाल लगायतका संरचना हटाउन निर्देशन दिएको छ । 

महानगरले कतिपय क्षेत्रमा संरचनाहरु स्वीकृत नलिई र सडक क्षेत्राधिकार मिचेर बनेको जनाउँदै यस्ता घर संरचना भत्काउने जनाएको छ ।

यस्तै नक्सापासमा बेसमेट पाकिङ स्वीकृत गरेर अन्य प्रयोजनका लागि प्रयोग गरिरहेको भए पार्किङको लागि प्रयोग गर्न समेत महानगरले निर्देशन दिएको हो । 

महानगरले तोकिएको समय भित्र संरचना नहटाए स्थानीय सरकार सञ्चालन ऐन २०७४ बमोजिम महानगर आफैंले हटाउने जनाएको छ । संरचना हटाउन लागेको खर्च सम्वन्धित व्यक्ति–संस्थाबाट असुल महानगरले सुचना मार्फत जनाएको हो ।