भक्तपुर– भक्तपुर नगरपालिकाले यस वर्षको दसैँमा दरबार क्षेत्रस्थित तलेजु मन्दिरमा सामान्य पूजाआजा गर्न नगरबासीलाई आग्रह गरेको छ । पछिल्लो समय जिल्लामा कोरोना संक्रमितको संख्या घटे पनि सन्त्रास अझै कायमै रहेकाले तलेजु मन्दिरमा सामान्य पूजाआजा गर्न अनुरोध गरेको हो । 

नगरप्रमुख सुनील प्रजापतिको अध्यक्षतामा जिल्ला प्रशासन कार्यालय, महानगरीय प्रहरी परिसर, नेपाली सेना, सशस्त्र प्रहरी, भक्तपुरका प्रतिनिधि, गुठी संस्थान भक्तपुरका प्रमुख र तलेजका पुजारीको बैठकले तलेजु मन्दिरमा सामान्य रूपमा पूजाआजा गर्न सुझाएको हो ।

बैठकमा नगरप्रमुख प्रजापतिले कोभिड महामारीमा दसैँमा शान्ति–सुरक्षाको व्यवस्थापन चुनौतीपूर्ण हुने बताउँदै पूजाआजा नरोक्ने, भीडभाड हुन नदिने, सामाजिक दूरी कायम गर्ने र स्वास्थ्य सुरक्षा मापदण्ड अपनाउने गरी मनाउन नागरिकलाई आह्वान गरिएको बताए ।
    
बैठकले कोभिड संक्रमण घट्दै गए पनि जोखिम भने अझै कायम रहेको अहिलेको अवस्थालाई दृष्टिगत तलेजुभित्र हुने सबै पूजामा बलि नदिई पुजारीबाट नित्य पूजा मात्र गर्ने व्यवस्था मिलाउने निर्णय गरेको हो ।

    
घटस्थापनादेखि विजयादशमीको दिनसम्म नगरका विभिन्न शक्तिपीठलगायत धार्मिक स्थलमा हुने मेला, पूजा र नवरात्रिमा स्वास्थ्य सुरक्षा मापदण्ड अपनाई भीडभाड नगर्न र सामाजिक दूरी कायम गरी कोभिड संक्रमणबाट बच्न नगरबासीलाई आह्वान गरेको पालिकाले जनाएको छ ।