रुपन्देही– लुम्बिनी प्रदेश सरकारले मातृ मृत्युदर कम गर्न लुम्बिनी प्रदेशका स्थानीय तहमा एकएक वटा पोर्टेवल अल्ट्रासाउण्ड मेसिनसहित तालिम प्राप्त नर्सको उपलब्ध गराउने भएको छ । लुम्बिनी प्रदेशको नवगठित सरकारको पहिलो क्याविनेट बैठकबाट प्रदेशका स्थानीय तहको भागको आधारमा एकएक वटा पोर्टेवल अल्ट्रासाउण्ड मेसिनसहित तालिम प्राप्त नर्सको उपलब्ध गराउने भएको हो ।

प्रदेशका १२ जिल्लामा ३६३ वटा वर्थिङ् सेन्टर सञ्चालन रहेका छन् । पोर्टेवल अल्ट्रासाउण्ड मेसिन पनि उपलब्ध गराएपछि अस्पतालका पहुँचबाट टाढा भएका महिलाहरुको लागि सहज हुने छ ।

पोर्टेवल अल्ट्रासाउण्ड मेसिनको माध्यमबाट तालिमप्राप्त जनशक्तिले गर्भवती आमा र बच्चाको अवस्था पत्ता लगाउन सक्नेछन् । धुर्काेट गाउँपालिका अध्यक्ष भुपाल पोखरेलले प्रदेश सरकाको यस निर्णयले स्थानिय तहमा मातृ मृत्युदर कमगर्न ठुलो सहयोग पुग्ने बताए ।

प्रदेशमा स्वास्थ्य संस्थामा प्रसुती हुने महिलाको संख्या ५७ प्रतिशत रहेको छ । त्यस्तै किशोरावस्थामै गर्भवती हुनेको संख्या १७ प्रतिशत रहेको छ । प्रदेशमा पाँचमा झण्डै १ हजार ७ सय नर्स कार्यरत छन् भने तीमध्ये १ हजारले एसबिए तालिम प्राप्त गरेको प्रदेश स्वास्थ्य मन्त्रालयको तथ्यांक छ ।