दाङ– नेत्रविक्रम चन्द ‘विप्लव’ नेतृत्वको नेकपाले दाङमा रचनात्मक काम गरेर पेट्रोलियम पदार्थको मूल्यवृद्धिको विरोध गरेको छ् । मंगलबारको नेपाल बन्दका क्रममा दाङको तुलसीपुर बजारमा सरसफाइ र मेटिएका ट्राफिक चिह्नलाई व्यवस्थापन गरेका छन् । बन्दकर्ताले सडक सरसफाइ र ट्राफिक चिह्न व्यवस्थापन गरेर रचनात्मक काम गरेका हुन् ।

बन्दकर्ताले कुचो समाएर सडक सफा गर्नेदेखि जेब्रा क्रसिङ निर्माण र रङ रोगनसमेत गरेका छन् । राजनीतिक कार्यकर्तारुले समाजमा रचनात्मक काम गरेर पनि विरोध गर्न सकिन्छ भन्ने देखाउन यस्तो काम गरिएको नेकपाका नेता हेमन्त प्रकाश वलीले बताए ।

‘सबै साथीहरूले नयाँ र रचनात्मक काम गरौँ भनेर प्रयास गरेका हौँ’, उनले भने, ‘मूल्यवृद्धिको विरोधमा बन्द भए पनि त्यसलाई सदुपयोग गरेर रचनात्मक बनाएका छौँ ।’ बन्दको समय सफा गरे नियमित अवस्थाको भन्दा राम्रो हुने र सडक खाली भएका बेला गरिएको पेन्टसमेत दीर्घकालीन हुने उनको भनाइ ।

लामो समयदेखि जेब्राक्रसिङ मेटिँदै गएको अवस्था हुँदासमेत त्यसको संरक्षण नभएको देखेर यसलाई नयाँ बनाइएको वलीले बताए । सडकमा यात्रा गर्नेलाई अब सहज हुने सर्वसाधारण बताउँछन् ।