ताप्लेजुङ– नेपाली कांग्रेस ताप्लेजुङको जिल्ला अधिवेशनमा झन्डै ११ सय मतदाता हुने भएका छन् । पालिका अधिवेशनसँगै प्रत्येक पालिकाबाट २ जनाका दरले अपाङ्गता भएका व्यक्तिको प्रतिनिधित्व गरेर आउने क्षेत्रीय प्रतिनिधिसमेत गरी १ हजार ७९ जना क्षेत्रीय प्रतिनिधि हुने कांग्रेस ताप्लेजुङका सचिव मंगल मेन्याङ्वोले जानकारी दिए । उनका अनुसार प्रत्येक पालिकाबाट २–२ जनाका दरले आउनेबाहेक अरू सबै क्षेत्रीय प्रतिनिधिको टुंगो लागेको छ ।
मेन्याङ्वोका अनुसार निर्वाचन क्षेत्र १ (क) बाट ५ सय ६४ र १ (ख) बाट ४ सय ९७ जना क्षेत्रीय प्रतिनिधि चयन भएका छन् । चयन भएका क्षेत्रीय प्रतिनिधिले सम्बन्धित पालिका र जिल्ला अधिवेशन दुवैमा नेतृत्व चयन गर्ने मतदानको अधिकार राख्छन् ।
गाउँपालिकाका लागि भने सम्बन्धित पालिकाबाट चयन भएका क्षेत्रीय प्रतिनिधिले आफ्नो पालिकाको नेतृत्व चयनमा मात्र मतदाता हुन पाउँछन् । सचिव मेन्याङ्वोका अनुसार बहालवाला सांसद, सांसदका उम्मेदवार, जिल्ला सभापति, वर्तमान र पूर्वकेन्द्रीय सदस्य स्वतः क्षेत्रीय प्रतिनिधि बन्न पाउनेछन् ।