भदौ २१, २०८०
रोल्पा - गंगादेव गाउँपालिकाको न्यायिक समितिले १० मुद्दा छिनोफानो गरेको छ । गाउँपालिकाकी उपाध्यक्ष अमृताकुमारी केसीको संयोजकत्वको समितिले १६ महिनायता १० वटा मुद्दा छिनोफानो गरेको हो ।
उपाध्यक्ष केसीका अनुसार सो अवधिमा १६ वटा मुद्दा दर्ता भएको थियो । स्थानीय बासिन्दालाई न्यायिक समितिको कार्यशैलीबारे जानकारी नभएकाले समितिमा थोरै मुद्दा दर्ता भएको उनले पालिकाखबरलाई सुनाइन् ।
तर पछिल्लो समय गाउँपालिकाले समितिबारे जनचेतनामूलक कार्यक्रममार्फत जानकारी दिएको उनको भनाइ छ । ‘न्यायिक समितिबारे स्थानीय बासिन्दामा भ्रम छ । प्रहरीकाेमा गए चाँडै न्याय पाइन्छ भन्ने विश्वास छ,’ उनले भनिन्, ‘हामी टोल टोलमा गएर न्यायिक समितिबारे जानकारी दिन थाल्यौं । पीडित महिलालाई समितिमा आउन आग्रह गर्यौँ । र, मुद्दा दर्ता हुन थाल्यो ।’
उनले आफ्नो क्षेत्राधिकारको विवादलाई स्थानीय भद्रभलामी, पूर्व गाविस सचिवसँग सल्लाह गरेर मुद्दाको छिनाफानो गर्ने गरेको उनले बताइन् । तरपनि न्यायिक समितिको कार्य सहज नभएको उनको अनुभव छ ।
गाउँपालिका विकट क्षेत्रमा भएकाले न्यायिक समितिमार्फत स्थानीयले सहज रुपमा न्याय पाउन सकेएको उनले बताइन् । ‘हाम्रोबाट जिल्ला अदालत र प्रहरी कार्यालय पुग्न एक दिन हिड्नु पर्छ । तर अहिले उहाँहरुले यहीबाट न्याय पाउन सक्नुहुन्छ,’ उनले भनिन्, ‘सल्यान र रुकुम सिमानाका स्थानीय बासिन्दालाई गाउँपालिका आउन ३ घण्टा लाग्छ । सो दुरी कम गर्नको लागि वडावडामा शिविर सञ्चालन कार्यक्रम ल्याएका छौँ ।’
उनले गत वर्ष उपभोक्ता समिति, योजना समितिलाई वडा/वडामा गएर गाउँपालिकाले दस्तावेजीकरण गर्न, समितिको कार्यबारे जानकारी दिनको लागि शिविर सञ्चालन गरिएको बताइन् ।
न्यायिक कार्यलाई थप प्रभावकारी बनाउनका लागि सबै वडाबाट प्रतिनिधि छनौट गरी ४८ घण्टे मेलमिलाप तालिम सञ्चालन गरिसकेको र सूचीकरणको प्रक्रिया सुरु गरेको उनले बताइन् । उनका अनुसार समितिमा कुटपिट, घरेलु हिंसा, जग्गा सिमानाको विवाद धेरै आउने गरेको छ ।
जनप्रतिनिधिमा निर्वाचित हुनुपूर्व आमा समूहमार्फत महिलाकाे क्षेत्रमा काम गर्ने उपाध्यक्ष केसी हाल गाउँपालिकामा महिला कर्मचारी थाेरै भएकाेले केही समस्या भाेग्नु परेकाे सुनाइन् । उनले भनिन्, 'हाम्राेमा महिला कर्मचारी थाेरै छन् । कानुनी सल्लाहकारकाे पनि व्यवस्था हुन सकेकाे छैन ,' उनले भनिन् 'साे व्यवस्थापन गर्नकाे लागि समन्वय समिति तथा पालिकामा पहल गर्दै आएकी छु ।'
फागुन २९, २०८०
फागुन २९, २०८०
फागुन २८, २०८०
कात्तिक १४, २०८१
