बैशाख २४, २०८१
साउन १९, २०८०
बाग्लुङ- गलकोट नगरपालिकाको एक विद्यार्थीले नगरप्रमुख भरत शर्मालाई सम्बोधन गरी पत्र लेखेका छन् । नगरपालिकाको वडा नम्बर ६ स्थित श्री शिव माध्यमिक विद्यालयमा कक्षा ६ मा अध्ययनरत महिम चालिसेले दिवा खाजा कटौती गरेको विषयमा नगरप्रमुख शर्मालाई पत्र लेखेका हुन् ।
सरकारले कक्षा ६ को दिवा खाजा कटौती गरेको र आफूहरु मर्कामा परेकोले सो समाधान गर्नको लागि नगरप्रमुख शर्मालाई उनले पत्रमार्फत अनुरोध गरेका छन् । उनले सरकारले दिवा खाजा कटौती गरेता पनि नगरपालिकाले खाजाको व्यवस्था गर्न अनुरोध समेत गरेका छन् ।
सरकारले कक्षा ६ को खाजा कटौती गरेको खबर पाएपछि आफूसँगै कक्षामा अध्ययरनत विद्यार्थीहरु चिन्तित भएको उनले पत्रमा लेखेका छन् । उनले कक्षा ६ मा खाजा नपाउँदा सरकारले कलिला बालबालिकालाई उपेक्षा गरेको अनुभूती भएको बताए ।
‘आदरणीय नगरप्रमुख ज्यू, गलकोट नगरपालिका समक्ष समाधान गर्नुपर्ने थुप्रै विषय हुँदा हुँदै पनि नेपाल सरकारले कटौती गरेको कक्षा ६ को दिवा खाजालाई 'बालबालिकामा गरेको लगानी, ल्याउँछ सुनौलो बिहानी' भन्ने नारालाई आत्मासात गर्दै स्थानीय सरकारले गराइदिनु भयो भने म लगायत गलकोट नगरपालिकाभित्र कक्षा ६ मा अध्ययनरत सबै विद्यार्थी आभारी हुने थियौँ,’ उनले लेखेका छन्, ‘अन्त्यमा नगरप्रमुख ज्यूलाई दिवा खाजा उपलब्ध गराइदिनु हुन भनि गरेको आग्रहलाई पक्कै पनि अन्यथा लिनु हुने छैन । यहाँको हृदय कलिला बालबालिकाप्रति सदैव सकारात्मक थियो, छ र हुनेछ भन्ने अपेक्षाको साथमा यो पत्र यही अन्त्य गर्दछु ।’ 
विद्यार्थीको सो पत्रप्रति आफ्नो ध्यानाकर्षण भएको नगरप्रमुख शर्माले बताए । टेलिफोनमार्फत पालिकाखबरसँग सम्पर्कमा आएका नगरप्रमुख शर्माले नगरपालिकामा आधिकारिक रुपमा कुनै पत्र नआएको तर सामाजिक सञ्जालबाट थाहा पाएको बताए । उनले भने, ‘सो पत्र अहिलेसम्म आधिकारिक रुपमा कार्यालयमा आएको छैन । तर मैले फेसबुकबाट थाहा पाए । सो पत्रप्रति मेरो ध्यानकर्षण भएको छ । ’
उनले आफूलाई नेपाल सरकारले कक्षा ६ को दिवा खाजा कटौती गरेको केही दिनअघि मात्रै थाहा पाएको जानकारी दिए । उनले भने, 'यो विषयमा मलाई थाहा थिएन । तर केही दिन अघि मात्रै केही व्यक्तिले सोबारे जानकारी दिएका थिए ।'
उनले केही समयअघि मात्रै थाहा भएकाले दिवा खाजाको विषयमा कुनै व्यवस्था नगरेको बताए । तर आफूलाई शिक्षक तथा सरोकारवाला निकायले सामान्य प्रश्न गर्ने गरेको बताए । उनले भने, ‘हामीले हालसम्म केही व्यवस्था गरेका छैनौ तर शिक्षकहरुको ‘पालिकाको व्यवस्था के छ ?’ भन्ने सामान्य प्रश्न आउने गरेको छ ।'
उनले नगरपालिकालाई 'बालमैत्री स्थानीय शासन' घोषणा गरेकोले सो विषयमा आवश्यक छलफल गर्ने प्रतिबद्धता व्यक्त गरे । पालिकाभित्र कक्षा ६ मा अध्ययनरत विद्यार्थीको संख्या, खाजाको लागत र स्रोतको सुनिश्चितता भएपछि मात्रै दिवा खाजाको व्यवस्था हुने बताए । सो विषयमा सरोकारवाला निकायसँग छलफल गरिने उनले पालिकाखबरलाई बताए ।
कात्तिक १४, २०८१
