नुवाकोट । रसुवाको धुञ्चेमा पशु सेवा सम्पर्क केन्द्र स्थापना गरेको छ । भेटेरेनरी अस्पताल तथा पशु सेवा विज्ञ केन्द्र नुवाकोटले  धुन्चेमा केन्द्र स्थापना गरी सञ्चालनमा ल्याएको हो । 

नुवाकोट र रसुवा कार्यक्षेत्र रहेको केन्द्रले जनशक्ति अभावका कारण पछिल्लो एक वर्षदेखि सेवा दिन सकेको थिएन। 

कर्मचारीको व्यवस्था गरेर केन्द्र सञ्चालनमा ल्याएको कार्यालय प्रमुख भरत पाण्डेले जानकारी दिनुभयो । दुई प्राविधिक थप गरेर ‘सम्पर्क केन्द्र’ सञ्चालनमा ल्याइएको हो । 'प्रादेशिक कार्यालयअन्तर्गत रहेको भेटेरेनरी अस्पताल तथा पशु सेवा विज्ञ केन्द्रको कार्यालय स्थापनाको समयदेखि रसुवामा सम्पर्क केन्द्र सञ्चालन भए पनि गत वर्षदेखि पूर्णरूपमा बन्द भएको सेवा सञ्चालनमा आएको छ', कार्यालय प्रमुख पाण्डेले भने। 

सेवा केन्द्रमार्फत पशुपक्षीपालक किसानलाई पशुपक्षी उपचार सेवा तथा परामर्श, प्राविधिक जानकारी, पशु सेवा विज्ञ केन्द्रले रसुवामा सञ्चालन गर्ने योजना तथा कार्यक्रमका लागि सम्झौतादेखि भुक्तानी प्रक्रियाका लागि निवेदन दिन नुवाकोटको विदुर आउनुपर्ने बाध्यता हटेको छ ।