ताप्लेजुङको सिदिङवा गाउँपालिका–४ साब्लाखु गाउँकी अप्सरा पन्दाक काठमाडौँमा स्नाकोतर तहमा अध्यनरत छिन् । यही मङ्सिर ४ गते हुन गइरहेको निर्वाचनमा मतदान गर्न अहिले उनी गाउँ पुगेकी छिन्। उनी पहिलो पटक मतदान गर्दैै छिन् । 

आफूले कुनै पार्टी नहेरेर विकास गर्नसक्ने योजना भएको उम्मेदवारलाई मतदान गर्ने योजना बनाएको उनी बताउँछिन् । उनी भन्छिन्, “मैले मतदान गरेको उम्मेदवारले गाउँमै राजगारीको सिर्जना गर्न सकोस् । रोजकारीका लागि भौँतारिन नपरोस्, शिक्षा, स्वास्थ, यातायात, सञ्चार क्षेत्रमा राम्रो विकास गरोस् ।”

भ्रष्टाचार नगरी नागरिकको हितको काम गर्ने उम्मेदवारलाई नै मत दिने सोचमा छन् फुङ्लिङ नगरपालिका–५ का सुवास रिजाल । उनी भन्छन्, “मैले मत दिएको उम्मेदवारले किसानको समस्यालाई बुझ्न सकोस् । किसानलाई सहुलियतमा ऋणको व्यवस्था गर्न सकोस् । कृषिमा रोजगारी सिर्जना गर्न सकोस् ।”

जिल्लाका अधिकांश मतदाताले सडकको स्तरोन्नति, कालोपत्र, गुणस्तरीय शिक्षा, स्वास्थ्य, रोजगारी, कृषि, औद्योगीकरणजस्ता विकासको अपेक्षा राखेका छन् ।  

हिजोदेखि शून्य अवधि सुरु भएकाले उम्मेदवारले आफ्नो जीत निकाल्नका लागि अहिले मतदातासँग भेटघाट र फोन सम्पर्कलाई जोड दिएका छन् । जिल्लामा बाम लोकतान्त्रिक गठबन्धन र एमालेसहित अन्य राजनीतिक दलबीच प्रतिस्पर्धा हुने देखिन्छ ।

यतिबेला कसले विजयको पगरी गत्थने हो भन्ने चर्चा मतदातार राजनीतिक दलका नेता कार्यकर्तामा अनेक अडकलबाजी हुन थालेको छ । 

यता किसानलाई चुनावभन्दा आफ्नो अन्नबाली भित्र्याउने चटारोले छोपेको छ । खेतबारीमा लगाएको बाली पाकेर काट्न र थन्क्याउन हतार छ । खेतमा धान काट्ने बेला भएको छ भने अलैँची बगानमा पाकेको अलैँची उठाउन ढिला भइसकेको छ । हिजोसम्म पनि कतिपय उम्मेदवार तथा नेता कार्यकर्ता खेतबारीमै पुगेर दुई हात जोडदै  भोट माग्दै आएका थिए ।

पाथीभरा याङ्वरक गाउँपालिकाकी राधिका भट्टराई भन्छिन्, “नेताको काम भाषण गर्ने हो । हाम्रो काम हामीले नै गर्ने हो । अहिले हात जोड्दै खेतबारीमा आउँछन् । भोट माग्ने मात्र आउँने हो । भोट दिएपछि खेतबारीमा आउँदैन ।” भोट दिएर जिताएका नेताहरुले किसानका लागि केही राहत पुग्ने काम नगरेको सिदिङवा गाउँपालिका–४ साब्लाखुका किसान केशव पन्दाक बताउँछन् । 

एक मात्र निर्वाचन क्षेत्र रहेको ताप्लेजुङमा प्रतिनिधिसभाका लागि सभा ११ जना र प्रदेशसभाका लागि १६ जना उम्मेदवार चनावी मैदानमा छन् ।