जुम्ला–यातायात व्यवस्था सेवा कार्यालय जुम्लाले चालू आवको पाँच महिनामा झन्डै ५६ लाख रुपैयाँ बढी राजस्व असुली गरेको छ । कार्यालयको नियमित कार्यक्रमअनुसार सवारी दर्ता, सवारी चालक अनुमति पत्र (लाइसेन्स) नवीकरण, सवारी साधन करलगायत शीर्षकबाट झन्डै ५६ लाख ६४ हजार ५ सय ७० रुपैयाँ राजश्व असुल भएको कार्यालयका सूचना अधिकारी लोकबहादुर महतले बताए ।

उनका अनुसार यातायात क्षेत्रको आम्दानीमार्फत २ लाख २५ हजार ५ सय, चालक अनुमतिपत्र, सवारी दर्तासम्बन्धी दस्तुरबापत १३ लाख २७ हजार ५ सय ३० र सवारी साधन करबापत ४१ लाख ११ हजार ५ सय ४० गरी जम्मा साढे ५६ लाख रुपैयाँ बढी राजस्व संकलन भएको हो । त्यस्तै, चालू आर्थिक वर्षको पाँच महिने तथ्यांकअनुसार जुम्लामा २ सय ९० वटा सवारी दर्ता भएका छन् । साउनमा ६२, भदौमा ४८, असोजमा ५९, कात्तिकमा ६८ र मंसिरमा ५३ जना सवारी दर्ता भएका हुन् ।

सबैभन्दा बढी निजी मोटरसाइकल झन्डै ३ सय दर्ता भएको यातायात व्यवस्था सेवा कार्यालय जुम्लाले जनाएको छ । ३ सय ३६ लाइसेन्स नवीकरण र १४ वटा प्रतिलिपि दिइएको छ । प्रक्रियागत विषयले लाइसेन्स वितरण रोकिए पनि कार्यालयका नियमित कामलाई सीमित जनशक्तिका बीच पनि निरन्तरता दिएको यातायात व्यवस्था सेवा कार्यालय जुम्लाका प्रमुख निरविक्रम शाहीले बताए ।

यातायात व्यवस्था सेवा कार्यालय जुम्लाले फागुनभित्रै सवारी चालक अनुमतिपत्र लाइसेन्स वितरण खोल्ने तयारी भइरहेको जनाएको छ । यातायात व्यवस्था सेवा कार्यालय जुम्लाका प्रमुख शाहीले भने, ‘सबैको दबाब र पहलले झन्डै ४ वर्षपछि जुम्लामा लाइसेन्स वितरण तयारी भइरहेको छ । कार्यालयले सबै तयारी गरिरहेको छ । केही प्राविधिक पक्ष बाँकी छ । चाँडै खोल्छाँै ।’

फागुनभित्रै खोल्ने तयारी भए पनि मिति तय नभएको कार्यालय प्रमुख शाहीको भनाइ छ । संघीयता कार्यान्वयन भएसँगै जुम्लाबाट लाइसेन्स वितरण बन्द भएको थियो । 

तर, लामो समयपछि मिडिया क्षेत्रले दिएको दबाब, कर्णाली प्रदेश र संघले दिएको चासो र यातायात व्यवस्था कार्यालयका कर्मचारीको सक्रियताले लाइसेन्स खोल्न थालिएको प्रमुख शाहीले उल्लेख गरे । सबैको सहयोग र साथले जुम्लामा सवारी व्यवस्थापनलाई प्रभावकारी सकिने भन्दै सहयोग अपेक्षा गरिएको शाहीको भनाइ छ ।

जुम्लामा बढ्दै गएको अटोरिक्सा, मोटरसाइकल खरिदले सवारी चाप बढ्दो छ । संघीयता कार्यान्वयनसँगै लाइन्सेस वितरण बन्द भएपछि समस्या भएको छ । यी समस्यालाई समाधान गर्न लागिपरेको यातायात व्यवस्था सेवा कार्यालय जुम्लाले जनाएको छ ।