काठमाडौं– संघीय राजधानी रहेको काठमाडौं महानगरले हालसम्म ८०० रोपनी सार्वजनिक जग्गा पहिचान गरी संरक्षण गरेको जनाएको छ । महानगर प्रमुख विद्यासुन्दर शाक्यले सार्वजनिक जग्गा संरक्षण गरेर पार्क निर्माण गर्ने नीतिअनुसार अहिलेसम्म करिब ८०० रोपनी सार्वजनिक जग्गा संरक्षण गरिएको बताए ।

‘सार्वजनिक महत्त्वका जग्गा संरक्षण गर्ने हाम्रै काम हो’, प्रमुख शाक्यले भने, ‘अब हामी अतिक्रमित जग्गालाई खुला बनाउँछौँ । त्यसपछि स्वामित्व दाबी गर्ने आउन थाल्छन् ।’ ३१ नम्बर वडाका वडाध्यक्ष नारायण भण्डारीले आफ्नो वडामा ३१ रोपनी सार्वजनिक जग्गाको पहिचान भएको जानकारी दिए । उक्त जग्गालाई संरक्षण गरी सामाजिक उपयोगमा ल्याइने उनले बताए ।

बागमती नदी किनारामा रहेको करिब ६ रोपनी जग्गामध्ये वरिपरि सडकलाई छाडेर बाँकी रहेको करिब ५ रोपनी क्षेत्रफलमा बाल उद्यान निर्माण गरिने भएको छ । बाल उद्यान निर्माणको हालै महानगरप्रमुख शाक्यले शिलान्यास गरे । उक्त उद्यान निर्माण जलपा निर्माण सेवाले ७७ लाख २२ हजार ८१३ रुपैयाँमा गर्ने भएको छ ।