दाङ– बेमौसमी वर्षाले खेतमा बाला झुलेर काट्न तयार धानको बोट पानीले डुबायो । काटेर घर भित्र्याउन ठिक्क पारेको धान खेतमै डुब्यो । अन्नको भण्डार मानिने दाङमा बेमौसमी वर्षाले करिब ७० करोड रुपैयाँ बराबरको धानबालीमा क्षति भएको छ ।
कृषि ज्ञान केन्द्रले दिएकोे तथ्यांकअनुसार जिल्लाका १० वटै पालिकाबाट प्राप्त क्षतिको विवरणका आधारमा वर्षाका कारण काटिएर सुकाउन राखिएको, बाढीले बगाएको र हावाहुरीसहितको वर्षाले ढालेर धानबालीमा भएको क्षति ६९ करोड १७ लाख ६ हजार २ सय २५ रुपैयाँ बराबरको रहेको कृषि ज्ञान प्रमुख बुद्धिराज घिमिरेले जानकारी दिए ।
काटेर घर भित्र्याउने तयारी गरेका यहाँका कृषकले धानबाली स्याहार्ने बेला अचाकन परेको हावाहुरीसहितको वर्षाले ठूलो क्षति गरेको छ । पानीले भिजेपछि धेरैजसो स्थानमा धान खेतमै उम्रिने अवस्था छ । ज्ञान केन्द्र प्रमुख घिमिरेले धानबालीमा भएको क्षति २७ हजार ६ सय ६८ दशमलव २५ मेट्रिक टन रहेको बताए । जिल्लामा सबैभन्दा बढी धानबाली क्षति घोराहीमा भएको छ ।
घोराहीमा १ हजार ९ सय ५ दशमलव ८८ हेक्टरमा क्षति हुँदा ६ हजार ७२ दशमलव ३ मेट्रिक टन, तुलसीपुरमा २ सय ७५ हेक्टरमा क्षति हुँदा ८ सय ५२ दशमलव ५ मेट्रिक टन, लमहीमा १ हजार ४ सय ३२ हेक्टरमा क्षति हुँदा ५ हजार १२ मेट्रिक टन धानबाली क्षति भएको छ ।
पहाडी क्षेत्र रहेको बंगलाचुली गाउँपालिकामा १ हजार ७९ हेक्टरमा क्षति हुँदा ३ हजार ३ सय ४४ दशमलव ९ मेट्रिक टन धानबालीमा क्षति भएको छ । यसैगरी पश्चिम दाङको शान्तिनगरमा ७ सय ६१ दशमलव ३ हेक्टरमा क्षति हुँदा २ हजार ३ सय ६० दशमलव १ मेट्रिक टन, बबई गाउँपालिकामा ५ सय २ दशमलव ५ हेक्टरमा क्षति हुँदा १ हजार २ सय ६८ दशमलव ८ मेट्रिक टन, राप्ती गाउँपालिकामा ७१ दशमलव ८ हेक्टरमा क्षति हुँदा २ सय २० दशमलव ६ मेट्रिक टन, राजपुर गाउँपालिकामा ८ सय ७५ दशमलव ३ हेक्टरमा क्षति हुँदा २ हजार १ सय ६६ दशमलव ७ मेट्रिक टन, गढवा गाउँपालिकामा ९ सय १९ दशमलव ७ हेक्टरमा क्षति हुँदा २ हजार ९ सय ८ दशमलव ८ मेट्रिक टन र दंगीशरण गाउँपालिकामा १ हजार १ सय २३ दशमलव ५ हेक्टरमा क्षति हुँदा ३ हजार ४ सय ५९ दशमलव ६ मेट्रिक टन धानबाली कामै नलाग्ने गरी नोक्सान भएको छ ।
जिल्लामा यो वर्ष खेतीयोग्य जमिनमध्ये ३९ हजार ४०० हेक्टरमा धान खेती गरिएको थियो । यसमध्ये ८ हजार ९ सय ९८ दशमलव ९ हेक्टरमा क्षति भएको छ । यो धान रोपिएको कुल क्षेत्रफलको २२ दशमलव ८३ प्रतिशत हो । कृषि ज्ञान केन्द्रका अनुसार जिल्लामा रोपिएको धानको कुल क्षेत्रफलमध्ये २२ दशमलव ८३ हेक्टरमा क्षति भएको छ । यो अवस्था विश्लेषण गर्दा जिल्लाका १० वटै पालिकामा गरेर २७ हजार ६ सय ६८ दशमलव २५ मेट्रिक टन धानबालीमा क्षति भएको छ ।
ज्ञान केन्द्रका अनुसार संकलन गरिएको विवरणका आधारमा सरकारले पीडित कृषकलाई क्षतिपूर्ति उपलब्ध गराउने बताइएको छ । यसका लागि जिल्लाबाट क्षतिको विवरण संकलन गरिएको कृषि ज्ञान केन्द्रले जनाएको छ । सबै पालिकाका कृषि शाखाबाट संकलन गरिएको क्षति विवरणलाई केन्द्रमा पठाइनेछ ।