चैत ०४, २०७७
मोरङ- मुलुकको राजनीति उथलपुथलको असर विभिन्न शैक्षिक संस्थाहरूमा पनि देखिन थालेको छ । मोरङको एउटा क्याम्पस यसको उदाहरण बनेको छ ।
सुन्दरहरैचामा रहेको सुकुना बहुमुखी क्यापसमा राजनीतिक प्रभावका कारण विद्यार्थी संगठनले तालै लगाइदिएका छन् । नेकपा फुटपछि आ-आफ्नो बाटामा माओवादी र एमाले लागे पनि त्यसको असर क्याम्पसमा देखिएको हो । नेकपा एमालेभित्रको विवादका कारण अनेरास्ववियु विभाजित हुँदा क्यापसमा ताला लागेको हो ।
केही दिनअघि माधव नेपाल निकट विद्यार्थी संगठनले १० बुँदे माग राख्दै क्याम्पस प्रशासनलाई ज्ञापनपत्र बुझाएका थियो । प्रशासनले विद्यार्थी संगठनका माग सम्बोधन गर्न टोली नै गठन गरेको थियो ।
त्यसको केही दिनमै प्रधानमन्त्री केपी ओली निकटका विद्यार्थी संगठनहरूले २१ बुँदे मागपत्रसहित क्याम्पस प्रशासनलाई ज्ञापनपत्र बुझाएका थिए । प्रधानमन्त्री ओली निकटका विद्यार्थी संगठनका माग सम्बोधन गर्न प्रशासनले वार्ता गरेको थियो ।
ओली निकटका विद्यार्थी संगठन क्याम्पस प्रशासनले वार्ता गरेपछि नेपाल निकटका विद्यार्थीले ताला लगाएका हुन् । दुवै पक्षले आ-आफ्नो संगठन आधिकारिक रहेको भन्दै आन्दोलन गरिरहेका छन् ।
आफ्ना मागलाई क्याम्पस प्रशासनले बेवास्ता गरेका कारण ताला लगाइएको नेपाल निकटका विद्यार्थी नेता सन्तोष लिम्बूले बताए ।
‘३ जेठ २०७५ पछिको अवस्थामा अदालतले पार्टीलाई फर्काएपछि त्यस समय हाम्रो नेतृत्वमा संगठन रहेको थियो’, लिम्बूले भने अहिले प्रधानमन्त्रीको पार्टी भन्दै अर्कै कमिटी गठन भएको छ ।’
प्रधानमन्त्री ओली निकटका विद्यार्थी संगठनले भने राष्ट्रिय राजनीतिको प्रभाव परेको बताउँदै आएका छन् । क्याम्पसमा एमालेकै २ वटा विद्यार्थी संगठन रहेका छन् ।
नेपाल निकट विद्यार्थीलाई माओवादी निकटका विद्यार्थी संगठनले साथ दिएका छन् । केन्द्रको असर क्याम्पसमा पनि देखिन थालेको ओली निकटका विद्यार्थी नेता मिलन घिमिरे सुनाउँछन् ।
ताला लगाइएको विषयमा भने क्याम्पस प्रशासन अनभिज्ञ छ । एमाले केन्द्रको झगडा क्याम्पसमा ल्याउन नहुने सहायक क्याम्पस प्रमुख अर्जुन अधिकारीले बताए ।
ताला लगाइएपछि पठनपाठन अवरुद्ध नबने पनि प्रशासनिक काम ठप्प भएको छ । क्याम्पस प्रमुख सहायक क्याम्पस प्रमुखको कार्यकक्षमा ताला लगाइएको छ ।
२०४८ मा स्थपना भएको सुकुना बहुमुखी प्रदेश १ कै राम्रो शैक्षिक संस्थाको रूपमा परिचित रहे पनि आन्दोलन हुँदै गएपछि विद्यार्थीको भविष्यको जिम्मा कसले लिने भन्ने चिन्ता छ ।
चैत २४, २०८०
चैत १३, २०८०
भदौ २३, २०८१
भदौ ०९, २०८१
भदौ ०९, २०८१
