ताप्लेजुङ– नेपालकै शक्तिपीठ मानिने ताप्लेजुङमा अवस्थित पाथीभरा क्षेत्रमा लागेको आगो नियन्त्रण बाहिर हुँदा मन्दिर क्षेत्र नै जोखिममा परेको छ । स्थानीय सामुदायिक वनमा लागेको आगो मन्दिरतर्फ बढी रहेको र मानिसले नियन्त्रण गर्न सम्भव नभएको पाथीभरा मन्दिरका कर्मचारी राजेन्द्र महतले जानकारी दिए ।
मन्दिरबाट करिव ३ किलोमिटर तल फावाखोलाको सिम्बु सामुदायिक वन क्षेत्रबाट सुरु भएको आगो मन्दिरतर्फ बढी रहेको र मानवीय प्रयासले नियन्त्रण गर्न समभव नभएको महतले जानकारी दिए ।
हावाको बेग उकालो भागतर्फ केन्द्रित भएकोले आगो बढ्न अझ सघाउ पुगिरहेको उनले बताए । आगो पाथीभरा क्षेत्रको खानेपानी मुहानबाट उकालो बढी सकेकोले मन्दिर क्षेत्र जोखिममा परेको उनले बताए । ‘सुख्खा मौसम छ, भुईमा भएको बस्तुदेखि रुख समेत बल्दै गएका छन्,’ मन्दिर क्षेत्र जोखिममा परेको अवस्था सुनाउँदै उनले भने ।
बिहीबारबाट देखिएको आगो हिजो पाथीभरा क्षेत्रका स्थानीय, प्रहरी र पाथीभरा क्षेत्रका कर्मचारी सबै लागेर निभाएको भएपनि फेरी जंगलमा कसरी आगो सुरु भयो भन्ने निक्र्यौल नभएको उनले बताए ।
आगो नियन्त्रण गर्न हेलिकोप्टर बाहेक अर्को कुनै विकल्प नभएको पाथीभरा क्षेत्र विकास समितिका सदस्य राजा मादेन(राजेन)ले जानकारी दिए । त्यहाँ पानीको समेत अभाव छ । जिल्ला विपद् व्यवस्थापन समितिका संयोजक एवम् प्रमुख जिल्ला अधिकारी झरेन्द्रप्रसाद चापागाँइले आगो नियन्त्रणका लागि नेपाली सेना, नेपाल प्रहरी र सशस्त्र प्रहरीको टोली आगलागी क्षेत्रतर्फ प्रस्थान गरेका बताए ।
तर, टोली आगलागी भएको क्षेत्र पुग्न कम्तिमा ३ देखि ४ घण्टा सम्म लाग्ने भएकोले आगो नियन्त्रण गर्न समस्या आउन सक्ने स्थिति देखिएको छ ।