विशाल शर्मा
नगरप्रमुख, चौरजहारी नगरपालिका, रुकुम पश्चिम

चौरजहारी नगरपालिकाका प्रमुख विशाल शर्माले कार्यभार सम्हालेपछि नगरभित्र विकास निर्माण, शिक्षा, स्वास्थ्यलगायत क्षेत्रमा काम गरे पनि संघीय सरकारबाट सक्दो सहयोग नपाएको बताउँछन् । उनीसँग जनप्रतिनिधिका रूपमा चार वर्षसम्म काम गर्दाको अनुभव, कोरोना महामारी नियन्त्रणमा नगरपालिकाले गरेका प्रयास, प्रदेश र संघीय सरकारसँग भइरहेका समन्वयमा केन्द्रित रहेर गरिएको कुराकानी :

भौगोलिक रूपमा विकट कर्णाली प्रदेशमा पर्ने नगरपालिकाको प्रमुख हुनुहुन्छ । कार्यकालको अन्तिम वर्षमा आइपुग्दा संघीय ढाँचाअनुसार कत्तिको काम गर्न सकियोजस्तो लाग्छ ? 

चार वर्ष पूरा गरेर अघि बढेका छौँ । जनताले पाँच वर्षको म्यान्डेट दिएका छन् । जनताको काम सहज बनाउन हामी अघि बढेका छौँ । विशेषगरी जनताको चाहनाअनुसार काम गरिरहेका छौँ । हामी आउँदै गर्दा नगरपालिकामा सडक थिएन । २ सय ५० किलोमिटर सडकको ट्रयाक खोलेका छौँ । १ सय किलोमिटर सडक ग्राभेल गरेका छौ । चार किलोमिटर सडक कालोपत्रे गरेका छौँ । थप ५० किलोमिटर सडक कालोपत्रे गर्ने योजना छ । खानेपानीको क्षेत्रमा वडा नम्बर १, ४, ८ र १४ मा धारा जडान गरेका छौँ । ९० प्रतिशत काम अन्य वडामा भएको छ । अधुरा कतिपय काम यो वर्ष सकाउँदै छौँ । 

नगरप्रमुखका रूपमा काम गर्दा चार वर्षमा भोगेका कठिनाइ के–के छन् ? 

बजेट नै मुख्य समस्या हो । बजेट अभाव छ । आवश्यकता र जनचाहना एउटा छ, बजेट अर्कोतर्फको छ । कानुनी कुरा बाझिएका छन् । प्रदेश र संघीय सरकारले मर्म नबुझ्दा समस्या छ । पुरानो संरचना टेकेर हामी अघि बढ्नुपरेको छ । खरिद ऐनले समस्या निम्त्याएको छ । शिक्षाको कुरा हेर्ने हो भने त्यहाँ पनि समस्या छ । 

प्रदेश र संघीय सरकारसँगको समन्वय कस्तो रह्यो ? 

स्थानीय तहको मर्म बुझ्ने स्थितिमा समन्वय हुन सकेको छैन । 

कोरोना महामारी नियन्त्रणमा नगर पालिकाले गरेका प्रयास र प्रदेश तथा संघीय सरकारले गरेका सहयोगबारे बताउनुस् न ? 

संघीय सरकारबाट के अपेक्षा गर्ने ? पछिल्लो स्थितिमा कोरोनाको समय खोपको व्यवस्था भएको छ । तेस्रो लहर आउने चेतावनी आइरहेको छ । पहिलो लहरमा धेरै समस्या भयो । पछिल्लो स्थितिमा सबै वडामा हामीले क्वारेन्टाइन, आइसोलेसनको व्यवस्था गर्‍यौँ । हाम्रो पालिकामा पीसीआर परीक्षण मेसिन जडान ग¥यौँ । अक्सिजन प्लान्ट सञ्चालनमा ल्याएका छौँ । ४५ मिनेटमा दुई वटा सिलिन्डर भर्न सक्ने व्यवस्था गरेका छौँ । कोरोना परीक्षणसम्बन्धी उपकरण हामीले व्यवस्था गरेका छौँ । 

संघीय सरकारको बजेटबारे तपाईंको टिप्पणी ? 

महामारीका बेला संघीय सरकारले जे गर्नुपथ्र्यो, त्यो देखिएन । सहानुभूति हुन सकेन । पालिकालाई व्यवस्थापनको जिम्मा दिनुपर्ने थियो, त्यो हुन सकेन ।