विश्वेश्वरप्रसाद ओझा (विपिन) 
नगरप्रमुख, अमरगढी नगरपालिका, डडेल्धुरा

विश्वेश्वरप्रसाद ओझा कांग्रेस सभापति एवं प्रधानमन्त्री शेरबहादुर देउवाको गृहनगर अमरगढीको नगरप्रमुख हुन् । देउवाको गढ मानिने क्षेत्रमै नेकपा एमालेबाट विजयी भएका विकासप्रेमीको पहिचान बनाएका ओझासँग अमरगढीले सुरु गरेका भौतिक पूर्वाधारलगायत विविध विषयमा गरिएको कुराकानी : 

कांग्रेस सभापति एवं प्रधानमन्त्रीको गृहनगरको नगरप्रमुख हुनुहुन्छ । हेभीवेट नेताको गृहनगरमा फरक दलबाट नगरप्रमुख निर्वाचित हुन कत्तिको गाह्रो भएको थियो ? 

संयोगले म निर्वाचित हुँदा वर्तमान सरकार प्रमुख शेरबहादुर देउवा नै प्रधानमन्त्री हुनुहुन्थ्यो । फरक पार्टीबाट प्रतिस्पर्धा गर्दा अलिकति असहज हुँदो रहेछ । मैले जनताको बीचमा राखेका एजेन्डालाई नागरिकले निर्वाचनमार्फत अनुमोदन गरिदिनुभयो । मलाई जिताउने नागरिकप्रति कृतज्ञ छु ।

निर्वाचित भइसकेपछि कुनै दबाब महसुस गर्नुभएन ? 

दबाब हुन्छ नै । फरक पार्टीबाट निर्वाचित भएको हुँदा देउवाको गृहनगरका कार्यकर्ता लेभलमा अहंकार, दम्भ हुँदो रहेछ नै । नियमित चुनाव जित्दै आएका प्रधानमन्त्री देउवाका कारण त्यसको प्रभावले काममा बाधा हुने संयोग चलिरहन्छ । हाम्रोमा त्यसको प्रभाव परेको छ ।

प्रधानमन्त्री देउवाकै क्षेत्रबाट नगरप्रमुख हुन सक्नुलाई तपाईंलाई केले काम गरेजस्तो लाग्छ ?

 
मैले लामो समय विद्यार्थी राजनीति गरेर यहाँ आएको हुँ । म डडेलधुरा क्याम्पसको स्ववियु सभापति भएँ । जनताको समस्या समाधान गर्नेतर्फ मेरो ध्यान त्यतिबेलैदेखि जान्थ्यो । त्यसैलाई आधार मानेर पनि मलाई नागरिकले निर्वाचित गरेजस्तो लाग्छ । 

अमरगढीले विकास निर्माणमा देशकै नमुना काम गरिरहेको छ । तपाईंको कार्यकालमा कति योजना पूरा होलान् ? 

स्वाभाविक रूपमै हामीले निर्वाचनताका जनताका बीचमा जनतालाई अनुभूति हुने गरी विकास निर्माण गर्ने भनेका थियौँ । पाँच वर्षे अल्पकालीन, १० वर्षे मध्यकालीन र २० वर्षे दीर्घकालीन गुरुयोजना निर्माण गरेर अघि बढेका छौँ । 

कोरोना महामारीका बेला सुदूरपश्चिमबाट विराटनगरसम्म पुगेर अक्सिजन बटुलेर संक्रमितको ज्यान जोगाउनुभयो । विपद्को व्यवस्थापनको तयारी कसरी गर्नुभएको छ ? 

डडेल्धुरा अस्पतालमा अक्सिजन प्लान्ट जडान गर्नुपर्छ भनेर तत्कालीन सरकारसँग पहल गरियो । अर्थमन्त्री विष्णु पौडेलले पदभार ग्रहण गरेसँगै डडेलधुरामा अक्सिजन प्लान्ट निर्माण गर्ने निर्णय गर्नुभयो भने १५ करोड १८ लाख रुपैयाँ विनियोजन गर्नुभएको थियो । त्यो रकमबाट आइसीयुदेखि अन्य थुपै्र उपकरण र अस्पतालको विकास गर्न सक्यौँ । अस्पतालमा देखिएका कयौँ समस्या सधैँका लागि समाधान भएका छन् ।

 
संघीयता कार्यान्वयनमा संघ र प्रदेश सरकारले खेलेका भूमिकाप्रति कत्तिको सन्तुष्ट हुनुहुन्छ ?

 
हामी नौलो अभ्यासमा छौँ । केही काम जुन गतिका साथ अघि बढ्नुपर्ने हो, त्यो बढेको छैन । सहकार्य, सहअस्तित्वमा समस्या देखिए पनि हामी निरास हुनुपर्दैन । प्रशस्त सम्भावना छ । अरूभन्दा पनि प्रदेश सरकारले जिल्लामा विषयगतथ कार्यालय स्थापना गरेको छ । यो गलत हो । जनताका लागि काम गर्ने भएकाले सहकार्यमा अघि बढ्नु नै उत्तम हुन्छ जस्तो लाग्छ । साना योजना पनि स्थानीय तहबाटै अघि बढाउन सके राम्रो हुन्छ । 

तपाईंको दल एमाले विभाजित भयो । यसबाट नगरपालिकामा कत्तिको असर पर्ने ठान्नुहुन्छ ?

 
दल विभाजन मुलुकका लागि ठीक होइन । असर पर्छ नै । केही जनप्रतिनिधि बाहिरिनुभएको छ । हाम्रोमा एक जना वडाध्यक्ष मात्रै एकीकृत समाजवादीमा जानुभएको छ । हाम्रोमा पार्टीलाई खासै असर परेको छैन । हामी एकढिक्का छौँ ।