रूपन्देही–सहरी विकासमन्त्री रामकुमारी झाँक्रीले सम्झौताअनुसार काम नगर्ने निर्माण व्यवसायीलाई कारबाही गर्न निर्देशन दिएकी छन् ।
गृहजिल्लाका विभिन्न कार्यक्रममा सरिक हुन गुल्मी आएकी मन्त्री झाँक्रीले शुक्रबार जिल्लास्थित कार्यालय प्रमुखसँगको छलफलमा केही निर्माण व्यवसायीका कारणले धेरै विकास योजना अलपत्र परेकाले सम्झौताअनुसार काम गर्नुपर्ने र त्यसो नभए कारबाही हुने बताइन् ।
निर्माण व्यवसायीले सम्झौताअनुसार समयमै काम नगर्दा विकास निर्माण पछि धकेलिने समस्या छ’, मन्त्री झाँक्रीले भनिन्, ‘सम्झौता गरेर काम नगर्ने र अलपत्र पारेर भाग्नेलाई समातेर कारबाही गर्नुस् ।’ गुल्मीमा थुप्रै विकासका योजना लामो समयदेखि अलपत्र परिरहेको उनको भनाइ छ ।
कार्यालय प्रमुखसँगको छलफलमा मन्त्री झाँक्रीले सबै सरकारी कार्यालयबाट हुने काम असार केन्द्रित नभएर पहिल्यै टुंग्याउनुपर्नेमा जोड दिइन् । उनले जिल्ला कारागार भवन निर्माण प्रक्रिया अगाडि बढाउन पहल गर्ने प्रतिबद्धता जनाइन् ।
गुल्मीका प्रमुख जिल्ला अधिकारी पुण्यविक्रम पौडेलले मनसुनजन्य विपद्को विषय जेठ र असारमा सम्झने अवस्था रहेकाले त्यसलाई अन्त्य गरी पहिल्यै तयारी गर्नुपर्ने बताए ।
मन्त्री झाँक्रीले डोजर प्रयोगले घरघरमा बाटो पु¥याउँदा विपद् निम्तिएका कारण यसलाई अन्त्य गर्न जरुरी रहेको धारणा व्यक्त गरिन् । जथाभावी सवारीसाधन सञ्चालनमा कडाइ, सिट क्षमता, यात्रु बिमाको व्यवस्था गरिए यातायात क्षेत्रलाई सुधार्न सकिने उनको भनाइ छ ।मन्त्री झाँक्रीले भनिन्, ‘उपभोक्ताबाट हुने योजना नियमन आवश्यक छ । तल्लो तहबाट हुने भ्रष्टाचार रोक्न पनि उपभोक्ताबाट हुने योजना अनुगमन र नियमन आवश्यक देखियो ।’