पाल्पा– पाल्पाको तानसेन नगरपालिकाले ‘एक वडा एक किलोमिटर सडक कालोपत्र’ गर्ने योजना अघि सारेको छ । गाउँ–गाउँमा पनि सहज यातायात सुविधा पुर्याउने उद्देश्यले नगरपालिकाले १४ वडाका ग्रामीण सडकमा कालोपत्रे सुरु गरेको हो ।
आठौँ नगर परिषद्ले निर्णय गरी चालू आर्थिक वर्ष ०७८/७९ बाट सञ्चालन गर्ने गरी बहुवर्षीय कार्यक्रमअन्तर्गत काम अगाडि बढाइएको हो । यसका लागि करिब १५ करोड रुपैयाँ बजेट विनियोजन गरिएको छ ।
पहिलो चरणमा ७०० देखि ९०० मिटरसम्म सडक कालोपत्र हुनेछ भने क्रमशः सबै वडाका सबै सडक आगामी तीन/चार वर्षभित्र कालोपत्रे हुँदै जाने नगर प्रमुख अशोककुमार शाहीले जानकारी दिए । वडा नम्बर २ मा उपभोक्ता समितिबाट काम अगाडि बढाइएको छ भने अन्य वडामा निर्माण व्यवसायीबाट काम अगाडि बढेको छ । निर्माणमा गुणस्तरीयता कायम गर्न प्रयोगशाला परीक्षण गरिएका निर्माण सामग्री प्रयोग हुने नगरपालिकाका इन्जिनियर रामप्रसाद श्रेष्ठले बताए ।
नगरपालिकाले यहाँका ग्रामीण क्षेत्रका सबै वडामा कच्ची सडक निर्माणसँगै बाहैै्र महिना सहज रूपमा यातायात सञ्चालनका लागि सडकमा कालोपत्रे गर्ने काम गरेको हो ।
एक वडा एक किलोमिटर सडक कालोपत्रे योजनाअन्तर्गत काम थालनी भइसकेको र आगामी माघभित्र सम्पन्न गर्ने लक्ष्यअनुसार काम भइरहेको वडा नम्बर ६ का वडाध्यक्ष सागरमान महर्जनले जानकारी दिए । गाउँमा सडक विस्तार तथा निर्माणलाई विकासको पहिलो खुट्किलो मानिन्छ । सडकको विकास हुँदै गर्दा अन्य सेवा–सुविधा भित्रिने आशामा स्थानीय खुसी छन् ।