बैतडी–कात्तिक पहिलो साता आएको बेमौसमी वर्षाले बैतडीको सिगास गाउँपालिकाका विभिन्न ठाउँमा सडक बगाएपछि स्थानीय जोखिमपूर्ण यात्रा गर्न बाध्य छन् ।

अहिले सिगासका मुख्य सडक थलाकाँडा–देउरा, बोहरी–लेकम, फाङेपौड–मसानीधार, भौनेली पातलदेखि वडा नम्बर ७ कार्यालय जानेलगायत मुख्य सडक र गाउँघरमा ओहोरदोहोर गर्ने अधिकांश बाटा भत्किएका हुन् । 

दुर्गम क्षेत्रका करिब १५ सडक बाढीपहिरोले भत्काएको सिगास वडा नम्बर ७ लेकमका सुरेन्द्र साउदले बताए । ‘हाम्रो पालिकाभित्र १५–२० वटा सडक बाढीपहिरोले बगाएको छ । गुणस्तरीय बाटो त कतै थिएनन् । तर, हिँड्न सकिने थिए । तीमध्ये अधिकांश सडक बगेका छन् । केही सडक नामोनिशानै मेटिने गरी भत्किएका छन् भने केही ठाउँमा पहिरो गएर अवरुद्ध छन् ।’ सडक भत्किएपछि स्थानीय जोखिम मोलेर यात्रा गर्न बाध्य भएको उनले बताए । 

बेमौसमी वर्षाले सिगास वडा नम्बर ६ र ७ बाट बझाङको देउरा बजार जाने मुख्य सडक बगाएपछि समस्या भएको स्थानीय ईश्वर साउदले बताए । उनले भने, ‘हाम्रो मुख्य बजार भनेकै देउरा बजार हो । दैनिक उपभोग्य वस्तु, नुनतेल, खाद्यान्नदेखि निर्माण सामग्रीलगायत सामान देउराबाटै ल्याउने गरेका थियौँ । देउरा जाने सडक ठाउँ–ठाउँमा भत्किएपछि जोखिम मोलेर यात्रा गरिरहेका छौँ ।’ 

सडक भत्किएपछि स्थानीय सेती नदीको माथिपट्टिको भीरबाट यात्रा गर्न बाध्य छन् । सडक बिग्रिएसँगै बुढापाका, सुत्केरी महिला र बिरामी ओहोरदोहोर गर्न सक्ने स्थिति छैन । 

विभिन्न स्थानका सडक भत्किएपछि सिगास गाउँपालिकाको वडा नम्बर ५, ६ र ७ का बासिन्दालाई बजारसम्म पुग्न मुस्किल भएको छ । ढुंगाडमा सेती नदीमाथिको पुल नै बाढीले बगाएपछि दैनिक उपभोग्य वस्तु ल्याउन दिनभर हिँड्नुपर्ने बाध्यता छ । विगतमा डोटीको आदर्श पालिकाका बजारबाट सामान ल्याउने गरेकामा अहिले डडेल्धुराबाट खच्चरमा सामान ल्याउनुपर्ने बाध्यता छ । खच्चरबाट सामान मगाउँदा १ केजीको १० रुपैयाँ तिर्नु परिरहेको स्थानीय राजेश चन्दले बताए ।

सडक निर्माण गर्न कसैको ध्यान नगएको सिगास वडा नम्बर ७ का भीम बोहराको गुनासो छ । उनले भने, बजारसम्म पुग्ने सबै सडक भत्किएकाले कहाँबाट सामान ल्याउने, के खाने भन्ने चिन्ता बढको छ । जसका घरमा युवा छन्, उनीहरू जोखिम मोलेरै सामान ल्याउँछन् । अशक्तलाई निकै समस्या छ ।’ 

सिगासका विभिन्न वडामा वर्षाका कारण पुगेको क्षतिबारे अवलोकन गर्न त्यहाँ पुगेका बैतडीबाट निर्वाचित संघीय सांसद दामोदर भण्डारीले सिगासबासीको समस्या समाधान गर्ने आश्वासन दिए ।

उनले सिगासमा भएको सबै क्षति अध्ययनपछि संसद्मा कुरा उठाउनुका साथै पुनर्निर्माणका लागि सकारका सबै निकायसँग पहल गर्ने बताए । सांसद भण्डारीको टोली गत १ सातादेखि सिगास भ्रमणमा छ । निरन्तरको वर्षाका कारण सिगासबासीको ७ सय रोपनी धान खेत बगरमा परिणत भएको जिल्ला प्रशासन कार्यालय बैतडीको तथ्यांक छ ।