धरान– सुनसरीको धरानमा स्मार्ट बसपार्क निर्माणका लागि निर्माण व्यवसायीसँग अन्तिम सम्झौता भएको छ । धरान उपमहानगर र निर्माण व्यवसायी गीताञ्जली जेभी दुहबी सुनसरीबीच बसपार्क निर्माणको सम्झौतापत्रमा हस्ताक्षर भएको हो ।

धरान उपमहानगर प्रमुख तिलक राई, उपप्रमुख मञ्जु भण्डारी, प्रमुख प्रशासकीय अधिकृत विदुरप्रसाद खनालको उपस्थितिमा ठेकेदार कम्पनीसँग सम्झौतापत्रमा हस्ताक्षर भएको उपमहानगरका वरिष्ठ इञ्जिनियर सुरज श्रेष्ठले जानकारी दिए ।

वडा नम्बर ८ स्थित तीनकुने सुन्दर बस्ती विकास आयोजनाको मल्टिप्रपोज एरियामा स्मार्ट बसपार्क निर्माण हुने भएको छ ।

कम्पनीले १५ दिनभित्र निर्माण कार्यलाई अगाडि बढाइने इञ्जिनियर श्रेष्ठले बताए । श्रेष्ठका अनुसार बसपार्क २३ करोड १५ लाख ३ हजार २ सय ९६ रुपैयाँ ४६ पैसामा निर्माण सम्पन्न गर्न ठेकेदार कम्पनीसँग सम्झौता भएको हो । 

उनले भने, ‘बसपार्क ३ वर्षभित्रमा निर्माण सम्पन्न गर्नुपर्नेछ । ५० प्रतिशत सरकारको अनुदान रहनेछ भने बाँकी ५० प्रतिशत स्रोत धरान उपमहानगरले व्यवस्थापन गर्नेछ ।’ 

उपमहानगर प्रमुख राईले लामो समयदेखि थाती रहेको योजनालाई सम्झौता गरेर अगाडि बढाउन लागिएको बताए । ‘धरानको विकास र समृद्धिका लागि लामो समयदेखि बसपार्क निर्माण योजना थियो । अब चाँडै पूरा हुने भयो ।’

 
चाँडोभन्दा चाँडो बसपार्क निर्माण सकियो भने धरानको सुन्दरता थप झल्किने राईको धारणा छ । राईले बसपार्क निर्माण योजना समयमै सम्पन्न गर्न ठेकेदार कम्पनीसँग आग्रह गरे ।

उपप्रमुख भण्डारीले ३० वर्षदेखि जनप्रतिनिधिले देखेको सपना अब पूरा हुन लागेको बताइन् । 

निर्माण व्यवसायी गीताञ्जली जेभीका सञ्चालक सपन दासले १५ दिनभित्र बसपार्क निर्माण थालिने जानकारी दिए । तोकिएको समयभित्र निर्माण पूरा गर्ने उनले प्रतिबद्धता जनाए ।