दार्चुला– दार्चुलाको मालिकार्जुन गाउँपालिकाले सबै वडा केन्द्रमा सडक पु¥याउन आर्थिक वर्ष २०७४÷०७५ मा खरिद गरेको एस्काभेटर २ वर्षयता मर्मत नहुँदा बीच बाटोमै अलपत्र छ ।

१ करोड १६ लाख रुपैयाँ लागतमा खरिद गरिएको एक्साभेटर मर्मत नगरी अलपत्र छाडेर भाडामा लिएर गाउँपालिकाको आम्दानी स्वाहा पारिरहेको हो ।

बिग्रेका यन्त्र उपकरण मर्मतसम्भार गर्नुको साटो विकासे गतिविधि ठेक्कामार्फत गरिन थालेपछि ती यन्त्र उपकरण बेकामे र अलपत्र पर्न थालेका हुन् । सो एस्काभेटरलाई सञ्चालन गर्न गाउँपालिकाले चालक र सहचालक गरी २ जना कर्मचारी नियुक्त गरेको थियो ।

तर, खरिद गरेको १५ महिनासम्म सो एस्काभेटर चले पनि २ वर्षदेखि भने गाउँपालिकाको केन्द्र रहेको वडा नम्बर ८ पापनामा अलपत्र छाडिएको छ ।

जनप्रतिनिधिले पालिकाको उपकरणलाई मर्मतसम्भार गर्नुको साटो कमिसनको भरमा ठेकेदारका डोजर प्रयोग गर्न थालेपछि गाउँपालिकाको उपकरण अलपत्र परेको स्थानीयको आरोप छ ।

मालिकार्जुन गाउँपालिका वडा नम्बर ८ का अध्यक्ष एवं गाउँपालिका प्रवक्ता प्रेम पन्तले सबै वडामा सडक विस्तार गर्न एस्काभेटर खरिद गरिए पनि अहिले सो उपकरण बिग्रिएको बताए । उनले समाचार आएपछि अलपत्र परेको एक्साभेटर मर्मत प्रक्रियामा बढेको सामाजिक सञ्जालमार्फत जानकारी गराएका छन् ।

गाउँपालिकाको वडा नम्बर ५ जाने सडक बनाउँदा २ वर्ष अगाडि एक्साभेटर खराब भएको थियो । मालिकार्जुनका अध्यक्ष नरेन्द्रसिंह धामीले भने उपाध्यक्ष नेतृत्वको समितिले नै एस्काभेटर मर्मत गर्न कार्यपालिकाबाट ४ पटक निर्णय गरिएको दाबी गर्छन् ।

गाउँपालिकाले बिग्रेको एस्काभेटर मर्मत गर्न ४ पटक निर्णय गरेको र त्यसको सम्पूर्ण जिम्मेवारी उपाध्यक्ष नेतृत्वको उपकरण मर्मत समितिलाई दिइएको जनाइएको छ । तर, उपाध्यक्ष पुष्पा अवस्थीले भने गाउँपालिकाका अध्यक्ष र प्रशासकीय अधिकृतले मर्मतका लागि बजेट दिनुको सट्टा आफूलाई बदनाम गर्न खोजेको आरोप लगाइन् ।

‘निर्णय मात्रै गर्ने तर बजेट माग गर्दा मर्मत शीर्षकमा रकम छैन भन्ने काम अध्यक्ष र प्रमुख प्रशासकीय अधिकृतले गर्ने गरेका छन् । महिला भएकै आधारमा आफूलाई बदनाम गर्न उपाध्यक्षले काम गरिनन् भनिएको हो’, उनले भनिन् ।

सो एक्साभेटर मर्मत गराउन लाग्ने सम्पूर्ण खर्च गाउँपालिकाले बेहोर्ने भनिए पनि उपाध्यक्ष अवस्थी बजेट विनियोजन नहुँदा मर्मत हुन नसकेको बताउँछिन् । उनले भनिन्, ‘बजेट माग्दा दिँदैनन् अनि अहिले समाचार र सामाजिक सञ्जालमा मेरो संयोजकत्वमा भनेर बदनाम गर्ने काम मात्रै भएको छ ।’

एक्साभेटर खरिद गरेदेखि यसअघि कर्मचारीले आफै मर्मतसम्भार भन्दै २०–२५ लाख रुपैयाँ बढी खर्च गरिसकेको उनले आरोप लगाइन् । एक्साभेटर बिग्रेको २ वर्ष हुँदा पनि गाउँपालिकाले २ जना कर्मचारीलाई भने निरन्तर तलब भत्ता खुवाइरहेको उनले जानकारी दिइन् ।