रसुवा– देशव्यापी अभियानका रुपमा सञ्चालन भएको दादुरा रुवेला खोप अभियानमा गोसाईकुण्ड गाउँपालिका लक्ष्यभन्दा धेरै बालबालिकालाई खोप लगाउन सफल भएको छ । 

पालिकाले यहि फागुन १६ गतेदेखि १९ गतेसम्म खोप अभियान चलाएको थियो । सो समयमा पालिकाभित्रका ९ महिनादेखि ५ वर्षमुनिका बालबालिकालाई खोप लगाएको हो । 

गाउँपालिकाले ६२० जना बालबालिकाहरुलाई खोप लगाउनुपर्ने लक्ष्य लिएको थियो । १८ वटा खोप केन्द्रबाट गाउँपालिकाले लक्ष्यको १०६ प्रतिशत बालबालिकालाई खोप लगाउन सफल भएको छ । खोप अभियानमा ६५६ जना बालबालिकालाई दादुरा तथा रुवेलाविरुद्ध खोप लगाएको गाउँपालिकाका स्वास्थ्य शाखा प्रमुख बिमल कुमार घिमिरेले बताए । 

खोप अभियान अघि व्यपकरुपमा प्रचारप्रसार गरेकाले लक्ष्यभन्दा बढी बालबालिकालाई खोप लगाउन सकिएको उनले बताए । ‘खोप अभियानको बारेमा जानकारी दिन स्वास्थ्य स्वयमसेविका र स्वास्यकर्मी बालबालिकाको घरमै पुग्नुभएको थियो । जनप्रतिनिधिले पनि खोप अभियानलाई सफल बनाउन साथ दिनुभयो,’ उनले पालिकाखबरसँग भने ।