कात्तिक २९, २०७८
दाङ–दाङको राप्ती स्वास्थ्य विज्ञान प्रतिष्ठानमा साना तथा ठूला शल्यक्रिया (अप्रेसन) का लागि चार वटा नयाँ अत्याधुनिक ‘ओटी रुम’ आइतबारदेखि सञ्चालनमा ल्याइएको छ । थप गरिएका ओटी रुमबाट बिरामीको शल्यक्रिया सुरु गरिएको छ ।
यसअघि प्रतिष्ठानमा सामान्य र जटिल प्रकृतिका शल्यक्रियाका लागि ओटी रुम दुई वटा मात्रै हुँदा आलोपालो गरेर विशेषज्ञ चिकित्सकले अप्रेसन गर्नुपर्ने अवस्था थियो । अहिले थप चार नयाँ ओटी रुम सञ्चालनमा ल्याई सेवा विस्तार गरिएको प्रतिष्ठानले जनाएको छ ।
नयाँ ओटी सञ्चालनमा आएसँगै बिरामीको उपचार थप सहज भएको प्रतिष्ठानकी अस्पताल निर्देशक डा. प्रज्ञा बस्नेतले जानकारी दिइन् । अप्रेसनका लागि नयाँ अत्याधुनिक उपकरण र थप विशेषज्ञ चिकित्सकको व्यवस्था मिलाइएको उनले बताइन् ।
आइतबारदेखि नै २५ बेडको प्राइभेट वार्ड सञ्चालनमा आएको अस्पताल निर्देशक डा.बस्नेतको भनाइ छ । विस्तारित स्वास्थ्य सेवा (इएचए) लाई प्रभावकारी बनाउनुका साथै बिरामीलाई छिटोछरितो सेवा प्रदान गर्न प्राइभेट वार्डले सहयोग पु¥याउने प्रतिष्ठानको विश्वास छ ।
प्राइभेट वार्ड सेवा दाङका लागि पहिलो र नवीनतम भएको प्रतिष्ठानले जनाएको छ । यो वार्डमा बिरामीका लागि छुट्टाछुट्टै क्याबिन बेड राखिएको छ । एसी सुविधा, प्रत्येक बेडका लागि छुट्टाछुट्टै शौचालय, अपांगतामैत्री शौचालय, लिफ्टबाट क्वाबिनसम्म जाने व्यवस्था, डाक्टर र स्वास्थ्यकर्मी २४ सै घन्टा उपलब्ध हुने व्यवस्थासहित सेवा सुरु गरिएको प्रतिष्ठानले जनाएको छ ।
प्राइभेट बेडसहित राप्ती स्वास्थ्य विज्ञानमा अब १ सय ७५ बेड सञ्चालनमा छन् । सिटी स्क्यान सेवा, आधुनिक ल्याब सेवा, अक्सिजन प्लान जडान, विभिन्न विशेषज्ञ सेवा प्रदान गरी उपचारका लागि जिल्ला बाहिर जानुपर्ने बाध्यता अब हट्नेछ ।
फागुन २९, २०८०
फागुन २८, २०८०
फागुन २८, २०८०
कात्तिक १४, २०८१
