रूपन्देही– तिलोत्तमा नगरपालिकाले कोरोना संक्रमणले थप जोखिम बढ्न सक्ने देखिएकाले कोभिड–१९ विरुद्धको खोप उपलब्ध गराउन रेडक्रसको अन्तर्राष्ट्रिय समिति आइसीआरसीसँग अनुरोध गरेको छ ।
नगरप्रमुख वासुदेव घिमिरेले आइसीआरसीका प्रमुखलाई पत्र लेख्दै कोरोना खोपको उपलब्धता र समन्वयका लागि अनुरोध गरेका हुन् ।नगरपालिकामा कोरोना संक्रमण तीव्र रूपमा बढेसँगै थप जोखिम निम्तिन सक्ने भएकाले खोप माग गरिएको पत्रमा उल्लेख छ ।
तिलोत्तमाका प्रवक्ता सुरेन्द्र श्रीले आइसीआरसीसँग खोप उपलब्ध गराउन अनुरोध गरिएकाले पाउने आशमा रहेको बताए । ‘पत्राचारसँगै नगरपालिकाले विभिन्न माध्यमबाट आइसीआरसीका प्रतिनिधि सम्पर्क गरिरहेको छ’, उनले भने, ‘उताबाट सकारात्मक प्रतिक्रिया आएको
छ ।’
पत्रमा नगरपालिकाका लागि ७० हजार डोज खोप उपलब्ध गराउन अनुरोध गरिएको छ । माग गरेजति सबै नआए पनि थोरै धेरै खोप आउने नगरपालिकाका प्रवक्ता श्रीले जानकारी दिए ।
‘हामीले नगरबासीलाई पुग्दो हिसाबले माग गरेका छौँ । उपलब्धता र अवस्था के छ, त्यसअनुसार आउला । थोरै आयो भने पनि हामी अरू संघ–संस्थासँग सम्पर्क गर्छौं ।’
तिलोत्तमा हालसम्म ५ हजार बढी संक्रमित भएका छन् । त्यसमध्ये ४ हजार २ सय निको भइसकेका छन् । कोरोना संक्रमणबाट नगरमा ८५ जनाले ज्यान गुमाइसकेका छन् । एक हजारजति अझै पनि आइसोलेसनमा रहेको तिलोत्तमानगरपालिकाको स्वास्थ्य शाखाले जनाएको छ ।