असोज ०३, २०७७
कास्की– पोखरा महानगरपालिकाद्वारा सञ्चालित गण्डकी बहुप्राविधिक शिक्षालयमा डिप्लोमा इन सिभिल इन्जिनियरिङ र डिप्लोमा इन अटोमोबाइल इन्जिनियरिङको पढाइ हुने भएको छ ।
३ वर्षे कोर्षको लागि शिक्षालयले भर्नाका लागि आवेदन खुला गरिसकेको पोखरा महानगरपालिका शिक्षा महाशाखाले जानकारी दिएको छ ।
एसइई उत्तीर्ण विद्यार्थीले असोज १५ सम्म अध्ययनको लागि आवदेन दिन सक्ने शिक्षा महाशाखा प्रमुख हेमप्रसाद आचार्यले जानकारी दिए । २ विषयमा ४८÷४८ कोटा निर्धारण गरिएको छ भने विभिन्न छात्रवृत्तिको पनि व्यवस्था गरिएको आचार्यले बताए ।
१० वटा पूर्ण छात्रवृत्ति र ६ वटा कोटा सहुलियत र ३२ वटा कोटा खुला छन् ।
पोखरा महानगरपालिकाले बजारको मागका आधारमा दक्ष प्राविधिक जनशक्ति उत्पादनको लक्ष्सहित ‘गण्डकी बहुप्राविधिक शिक्षालय’ स्थापना गरेको हो ।
अटोमोबाइल इन्जिनियरिङसम्बन्धी आवश्यक सीपको अभावमा यहाँका युवा बेरोजगार बस्नुपर्ने बाध्यता रहेको अवस्थामा पोखरा महानगरपालिकाले यस क्षेत्रमा आवश्यक दक्ष जनशक्ति उत्पादन गर्ने लक्ष्यअनुसार अटोमोबाइल इन्जिनियरिङको अध्यापन सुरु गरेको हो ।
महानगरले प्राविधिक शिक्षा तथा तालिम परिषद् (सिटिइभिटी) बाट सम्बन्धन लिएर वडा–२९ भण्डारढिकमा स्थापना गरेको बहुप्राविधिक शिक्षालयल प्राविधिक विषयमा अध्ययन गराउनेछ ।
स्वदेशभित्रै गाडीका पार्टपुर्जा तथा उपकरणको उत्पादन नभएपछि छिमेकी मुलुकबाट आयात हुने गरेको छ । उच्च रोजगारी प्राप्तिको क्षेत्र भए पनि देशभित्र सो कामका दक्ष जनशक्ति नहुँदा ठूलो धनराशी बाहिरिएको छ ।
सिभिल इन्जिनियरिङका अधिकांश प्राविधिक शिक्षालयहरूमा पढाइ हुने भए पनि अटोमोबाइल पढाइ हुने कलेज तथा क्याम्पस नगन्य छन् । इन्जिनियरिङ अध्ययन संस्थानअन्तर्गतको पश्चिमाञ्चल क्याम्पसमा केही वर्षअघि अटोमोबाइल विषय अध्यापन गरिए पनि हाल त्यसको पठनपाठन हुँदैन ।
यस वर्ष पहिलोपटक २ विषयमा प्राविधिक विषय अध्यापन गरिए पनि शिक्षालयको पूर्वाधार निर्माणपछि थप प्राविधिक कक्षासमेत थप्ने योजना नगरपालिकाले बनाएको छ ।
सिभिल इन्जिनियरिङका लागि ३ वर्षको १ लाख ९५ हजार शुल्क तोकिएको छ भने अटोमोबाइलको १ लाख ७५ हजार तोकिएको छ ।
पूर्वाधार नबन्दासम्म सुरुमा महानगरले जनप्रकाश माध्यमिक विद्यालयमा कक्षा सञ्चालन गर्ने योजना बनाएको छ । पोखरा महानगरका केही वडा कार्यालयहरूले आफ्नो वडामा बस्ने विद्यार्थीमध्येबाट १ जनालाई वडा कार्यालयकै खर्चमा पढाउने प्रतिबद्धता व्यक्त गरेका छन् ।
बैशाख २७, २०८१
बैशाख २४, २०८१
कात्तिक १४, २०८१
