बागलुङ– शिक्षा, विज्ञान तथा प्रविधिमन्त्री देवेन्द्र पौडेलले विद्यालय समय पढाइमा मात्र ध्यान केन्द्रित गर्न शिक्षकलाई आग्रह गरेका छन् ।  बागलुङ नगरपालिका वडा नम्बर १४ मा रहेको गणेश माध्यमिक विद्यालयको ४१औँ वार्षिकोत्सवलाई सम्बोधन गर्दै मन्त्री पौडेलले शिक्षकको काम पढाउने भएकाले विद्यालय समय अन्य गतिविधिमा नलाग्न निर्देशन दिए ।

 
‘शिक्षकको काम पढाउने हो, विद्यार्थीको काम पढ्ने हो,’ उनले भने, ‘अभिभावको सहयोग, शिक्षकको लगनशीलता र विद्यार्थीको सक्रियता भए सार्वजनिक शिक्षामा सुधार हुन्छ ।’ शिक्षा मन्त्रालयको कार्यभार सम्हालेलगत्तै विद्यालयमा शिक्षक अभाव देखिएकाले शिक्षा नियमावलीको ११औँ संशोधन मन्त्रिपरिषद्बाट पासिरत गराएर विज्ञापन खुलाउन सफल भएको उनले बताए । विद्यार्थीलाई किताबी ज्ञानले मात्र नहुने हुँदा शिक्षकलाई अहिलेको प्रविधिसँग अपडेट हुन उनले सुझाए । 

राष्ट्रपति शैक्षिक सुधार कार्यक्रमलाई थप व्यवस्थित गर्दै ३ वर्षभित्र देशभर विद्यालय भवन बनाउने लक्ष्य रहेको उनको भनाइ छ । प्राविधिक शिक्षामा मन्त्रालयको जोड दिइरहेको बताउँदै उनले भने, ‘नेपालको सार्वजनिक शिक्षा राम्रो छैन । सार्वजनिक शिक्षामा सुधार गर्न मन्त्रालय प्रतिबद्ध छ ।’५ वर्षदेखि रोकिराखेको आन्तरिक शिक्षक बढुवा थालिएकाले ३३ सय बढी शिक्षकको बढुवा हुने मन्त्री पौडेलले जानकारी दिए ।