बाग्लुङ–  बाग्लुङको बरेङ गाउँपालिकाले सामुदायिक विद्यालयको शैक्षिक गुणस्तर सुधारका लागि ‘गाउँपालिका अध्यक्ष शैक्षिक सुधार कार्यक्रम’ कार्यान्वयनमा ल्याएको छ ।
शिक्षासँग सम्बन्धित विभिन्न ६ शीर्षकमा गाउँपालिकाले चालू वर्षमा कार्यक्रम सञ्चालन गर्ने भएको हो ।

यसका लागि झन्डै ३ करोड रुपैयाँ खर्चिने योजना गाउँपालिकाको छ । यो विद्यालयले ससर्त पाउने अनुदान र शिक्षक कर्मचारीको तलबबाहेकको रकम हो ।

शिक्षक, विद्यार्थी र अभिभावकसँग जोडिएका कार्यक्रम सञ्चालनदेखि पूर्वाधार निर्माणका लागि गाउँपालिकाले आफ्नै कार्यक्रम बनाएको अध्यक्ष कृष्णप्रसाद शर्मा बताउँछन् ।

‘सामुदायिक विद्यालयले पाउने ससर्त बजेटले मात्रै शैक्षिक गुणस्तर वृद्धिको आशा गर्न सकिन्न,’ शर्माले भने, ‘सिसाकलम किन्न सक्ने बजेट नहुने विद्यालयले कसरी शैक्षिक सामग्री खरिद गरेर पठनपाठन गराउन सक्छन् ? त्यसैले विद्यालयलाई सघाउन हामीले यो कार्यक्रम ल्याएका हौं ।’

विद्यालयको ५० र गाउँपालिकाको ५० प्रतिशत खर्च हुने गरी विद्यालयसँग शिक्षा शाखाले कार्यक्रम मागेको छ । शैक्षिक पूर्वाधार निर्माण, सञ्चालन, मर्मत र व्यवस्थापन तथा शैक्षिक सामग्रीको पर्याप्तताका लागि कार्यक्रम ल्याइएको शर्माले जानकारी दिए ।

गाउँपालिकाले शैक्षिक क्षेत्रको सुधारका लागि फरक र रचनात्मक अभ्यास गर्दै आएको छ । कोभिड–१९ का कारण प्रभावित भएका विद्यार्थीका लागि रेडियो टेलिभिजन कार्यक्रमदेखि अभिभावकलाई सक्रिय बनाउनेसम्मका कार्यक्रम सञ्चालन गरिरहेको प्रमुख प्रशासकीय अधिकृत रमेश थापाले जानकारी दिए ।

‘झन्डै २ करोड रुपैयाँ पूर्वाधारमा खर्च हुन्छ । अरु रचनात्मक कार्यक्रमको लागि पर्याप्त बजेट बनाएका छौं,’ थापाले भने । विद्यालयका भवन मर्मतदेखि रङरोगन गर्ने, सौचालय मर्मत, सरसफाइलगायतका काममा गाउँपालिकाले सहयोग गर्ने भएको हो । साझेदारीले अपनत्व विकास गराउने र विद्यालयलाई कामप्रति जिम्मेवार बनाउने उनी बताउँछन् ।

गाउँपालिकाले विद्यार्थीबीच पालिकास्तरीय निबन्ध प्रतियोगिता, विद्यालयको सघन अनुगमन, बालकक्षा सुधार, बालमैत्री शिक्षालगायतका कार्यक्रमलाई पनि प्राथमिकतामा राखेको छ ।

विद्यालयलाई व्यावहारिक शिक्षामा जोड दिन गाउँपालिकाले बेलाबेला सुझाउने गरेको छ । बरेङमा ३५ सामुदायिक विद्यालय छन् । विद्यार्थी संख्या धेरै भएका विद्यालयमा शिक्षक दरबन्दी थप र कम भएकामा शिक्षक दरबन्दी कटौती गर्नसमेत गाउँपालिकाले अध्ययन गरिरहेको छ ।