भदौ २७, २०८१
असोज २०, २०७७
काभ्रे– काभ्रेको खानीखोला गाउँपालिकामा कोभिड– १९ को संक्रमणको जोखिम बढेपछि गाउँपालिकाका सबै विद्यालयहरू बन्द गरिएका छन् ।
खानीखोला गाउँपालिका वडा– ३ को स्वास्थ्य चौकीमा ज्वरो आएर उपचार गर्न आएका महाभारत गाउँपालिकाका २७ वर्षीय एक पुरुषको कोरोना भाइरसकै कारण मृत्यु भएसँगै गाउँपालिकाले सबै विद्यालयहरू बन्द गरेको हो ।
विगत छ महिनादेखि बन्द रहेका विद्यालय १३ असोजदेखि नियमित सञ्चालनमा आएका थिए । गाउँपालिकामा इन्टरनेट, फोन, बिजुलीबत्ती आदिको असुविधा भएका कारण वैकल्पिक विधिबाट पठनपाठन गर्न समस्या भएको जनविकास उच्चमाविका प्राचार्य देशबहादुर वाइवाले बताए ।
उनले भने, ‘विद्यालय खोलेको तीन दिनपछि विद्यार्थीहरूमा ज्वरो आउने, रुघाखोकी आदि लक्षण देखिन थालेसँगै विद्यालय बन्द गर्नुपरेको हो ।’
हाल खानीखोला गाउँपालिका वडा– ३ को सम्पूर्ण स्थानलाई सिल गरी मृतक तथा मृतकको परिवारको सम्पर्कमा आएका १९ जनाको स्वाब संकलन गरी धुलिखेल पठाइएको खानीखोला गाउँपालिकाकी उपाध्यक्ष रुक्मिणी गुरुङले बताइन् ।
उनका अनुसार तत्कालका लागि एक हप्ता विद्यालय बन्द गरिए पनि कोरोना भाइरसको जोखिम घटेपछि विद्यालय पुनः सञ्चालनमा आउनेछन् । हाल खानीखोला गाउँपालिकामा कोराना संक्रमित भने कोही पनि छैनन् ।
कात्तिक १४, २०८१
