हेलम्बु गाउँपालिकाले माध्यमिक शिक्षा एउटै विद्यालयबाटै दिने उद्देश्यले सुरु गरेको नमुना विद्यालय निर्माण अन्तिम चरणमा पुगेको छ । 

सामुदायिक विद्यालयको शैक्षिक गुणस्तर सुधारेर छरिएर रहेका माविसम्मका विद्यालयमा अध्ययनरत विद्यार्थीहरूलाई एउटै विद्यालयमा राखेर गुणस्तरीय शिक्षा दिने उद्देश्यले गाउँपालिकाले गत वर्षदेखि नमुना विद्यालय निर्माण सुरु गरेको हो ।

कोरोना महामारी नफैलिएको भए यसै शैक्षिक सत्रदेखि कक्षा सुरु गर्ने गाउँपालिकाको योजना थियो । नमुना विद्यालयमा आगामी शैक्षिक सत्रदेखि पढाइ सुरु गरिने गाउँपालिकाका अध्यक्ष निमाग्याल्जेन शेर्पाले जानकारी दिए ।

हेलम्बु गाउँपालिका इचोकको घोप्टेघ्याङमा निर्माण सुरुवात गरिएको नमुना विद्यालयमा यो वर्ष १८ कोठाको विद्यालय भवन निर्माण सम्पन्न भएको  गाउँपालिका अध्यक्ष निमाग्याल्जेन शेर्पाले बताए । ‘अरू भवनहरू पनि निर्माण हुँदै छन् । यो वर्षभित्र सम्पन्न हुने तयारीका साथ काम भइरहेको छ’, अध्यक्ष शेर्पाले भने । नमुना विद्यालयमा यो वर्ष होस्टल, प्रशासनिक भवन, शौचालय, खेलमैदानलगायतका संरचना निर्माण गरिनेछ । ‘पहिलो चरणमा २३ कोठाको विद्यालय भवन तयार गरिनेछ ।

आवश्यकताअनुसार हामी कक्षाकोठा थप्दै जाने सोचमा छौं’, गाउँपालिका अध्यक्ष शेर्पाले भने, ‘सुविधासम्पन्न विद्यालयमा सबै विद्यार्थीका लागि नयाँ शैलीको छात्रावाससमेत निर्माण हुनेछ । एकै कोठामा धेरै विद्यार्थी राख्नेभन्दा गाउँको परम्परागत शैलीका घर निर्माण गरेर विद्यार्थीहरूलाई छात्रावासमा राख्ने योजना छ ।’ 

यसबाट छात्रवासमा बसेका विद्यार्थीहरू आफैं कृषि उत्पादनमा जोडिने र उनीहरूले नै उत्पादन गरेका कृषि वस्तु उपभोग गर्ने योजना गाउँपालिकाले अघि सारेको छ ।

हेलम्बुमा सुरु गर्न लागिएको नमुना विद्यालयमा बुद्धिस्टहरूको अन्तर्राष्ट्रिय भाषा ‘सम्भोटा’ र हिन्दुहरूको संस्कृत विद्यासमेत विद्यार्थीहरूलाई पढाउने तयारी गाउँपालिकाको छ । ‘बुद्धिस्टहरूले पनि संस्कृत पढ्छन् र हिन्दुहरूले पनि सम्भोटा पढ्छन्’, गाउँपालिका अध्यक्ष शेर्पाले भने । ४० रोपनीमा निर्माण भइरहेको विद्यालयमा पौडी पोखरी, शिक्षक आवासगृहलगायत सुविधा हुनेछ । 

गाउँपालिकको आन्तरिक स्रोत, जिल्ला समन्वय समिति र बाग्मती प्रदेशको सामाजिक विकास मन्त्रालयको सहयोगमा १४ कोठा र थप ४ कोठा जिल्ला आयोजना कार्यान्वयन इकाइ शिक्षाको सहयोगमा निर्माण भइसकेको गाउँपालिकाका प्रमुख प्रशासकीय अधिकृत भीमराज कोइरालाले जानकारी दिए ।

‘सरकारी विद्यालयहरू बचाउनका लागि पनि हामीले यो अवधारणा सुरु गरेका हौं, जुन देशभरका लागि नमुना हुनेछ,’ अध्यक्ष शेर्पाले भने । सुरुमा कक्षा १० सम्म र त्यसपछि १२ कक्षा हुँदै आवश्यकताका आधारमा स्नातक तहसम्म यही विद्यालयमा अध्ययन गर्ने व्यवस्था मिलाइने अध्यक्ष शेर्पाले बताए । 

नमुना विद्यालयमा एउटा विषयको कम्तीमा पनि १० विषयगत शिक्षक राखेर गुणस्तरीय शिक्षा दिने गाउँपालिकाले योजना बनाएको अध्यक्ष शेर्पाले जानकारी दिए । हेलम्बु गाउँपालिकामा हाल ९ वटा मावि तह पढाइ हुने विद्यालय छन् । तीमध्ये देशकै नमुना माविको रुपमा परिचित मेलम्चीको घ्याङ मावि भने तत्कालै नहटाउने योजना रहेको अध्यक्ष शेर्पाको भनाइ छ ।

भूकम्पपछि हेलम्बु क्षेत्रमा कारितास स्विट्जरल्यान्डले विद्यालय भवनहरू निर्माण सम्पन्न गरेको थियो । गाउँपालिकाको अग्रसरतामा निर्माण हुन लागेको नमुना विद्यालयको पनि सबै डिजाइन उसकै हुने पालिकाले जनाएको छ ।

यो वर्ष १८ कक्षा कोठा निर्माण सकिने र आगामी वर्ष थप गरेर ४० वटासम्म कक्षाकोठा निर्माण गर्ने योजना रहेको गाउँपालिकाका प्रमुख प्रशासकीय अधिकृत भीमराज कोइरालाले बताए ।

सामुदायिक विद्यालयका विद्यार्थी–शिक्षकलाई खाजा 

हेलम्बु गाउँपालिकाले सामुदायिक विद्यालयका विद्यार्थी तथा शिक्षकहरूलाई दैनिक रुपमा खाजा खुवाउने भएको छ । चालू आर्थिक वर्षको नीति तथा कार्यक्रममा गाउँपालिकाले सबै सामुदायिक विद्यालयका विद्यार्थी तथा शिक्षकहरूका लागि खाजाबापत दैनिक १५ रुपैयाँका दरले दिने भएको हो ।

नेपाल सरकारले बाल विकासदेखि कक्षा ५ सम्मका विद्यार्थीहरूका लागि खाजा व्यवस्था गरेको थियो । तर, एउटै विद्यालयमा कसैलाई खुवाउने र कसैलाई नखुवाउँदा विभेद भएकाले यो वर्षदेखि सबै कक्षाका विद्यार्थीलाई खाजा खुवाउन बजेट विनियोजन गरिएको हेलम्बु गाउँपालिका अध्यक्ष निमा ग्याल्जेन शेर्पाले बताए ।

केन्द्र सरकारले गत वर्षदेखि बालविकासदेखि कक्षा ५ सम्मका विद्यार्थीहरूका लागि खाजाबापत दैनिक १५ रुपैयाँ प्रदान गर्दै आएको थियो ।

हेलम्बु गाउँपालिकाले भने अब आफ्नै बजेटबाट कक्षा ६ देखि १० सम्मका विद्यार्थीका लागि खाजाबापत केन्द्र सरकारले प्रदान गरेसरह दैनिक १५ रुपैयाँ उपलब्ध गराउन लागेको अध्यक्ष शेर्पाले जानकारी दिए ।