चितवन– बागमती प्रदेशका श्रम तथा यातयातमन्त्री घनश्याम दाहालले यातयात कार्यालयमा सेवाग्राहीसँग घुस खाने कर्मचारीलाई कारबाही गर्ने चेतावनी दिएका छन् ।

आइतबार भरतपुरस्थित यातायात सेवा कार्यालयको अनुगमनपछि कर्मचारीलाई निर्देशन दिँदै मन्त्री दाहालले कुनै पनि बहानामा नागरिकबाट घुस लिएको खबर आए कर्मचारीलाई कारबाही गर्ने बताएका हुन् ।

‘चितवनमा केही दिनअघि कर्मचारीले सेवाग्राहीबाट घुस खाएको घटना बाहिर आएको छ, सेवाग्राहीलाई समस्या देखाएर घुस खाने काम बन्द गर्र्नुस्, फेला परे कारबाही गर्छौं’, उनले भने । मन्त्री दाहालले सेवाग्राहीलाई कर्मचारीले बढी पैसा मागे अख्तियार दुरुपयोग आयोगमा उजुरी गर्न सेवाग्राहीलाई आग्रह गरे ।

उनले बागमती प्रदेशमा यातायात सेवालाई नमुना बनाउने अभियानमा गृह जिल्ला चितवनबाट अनुगमन सुरु गरिएको जानकारी दिए । यातायात क्षेत्रमा बागमती प्रदेशलाई मुलुककै नुमना बनाउने घोषण उनले गरे । यातायात व्यवस्था कार्यालयबाट प्रदान हुने सेवाप्रति सेवाग्राहीको जनगुनासो बढेपछि सेवालाई गुनासोरहित बनाउन यातायात सेवा कार्यालय भरतपुरबाट अभियान थालिएको उनको भनाइ छ ।

‘यातायात कार्यालयलाई एउटा गतिमा लग्नुपर्नेछ’, उनले भने, ‘कार्यालयमा हुने ढिलासुस्तीबारे जनगुनासो आउनुभएन, सेवाग्राहीलाई छिटोभन्दा छिटो सेवा दिनुस्,’ उनले कर्मचारीलाई निर्देशन दिए । मन्त्री दाहालले अहिले नवीकरणको काम गर्दा त गुनासो आउँछ भने भोलि चितवनमा लाइसेन्स नै बनाउँदा के होला भनी प्रतिप्रश्न गरे ।

अहिले सबैभन्दा बढी काम यातयात कार्यालयबाट हुने र बदनामा पनि कार्यालय नै रहेको उनको टिप्पणी छ । चितवनको यातयात कार्यालयलाई देशकै नमुना बनाउन सरकार तत्पर रहेको उनले दाबी गरे ।

मन्त्री दाहालले लाइनमा बसेका सेवाग्राहीसँग कार्यालयले प्रदान गर्ने सेवाबारे जानकारीसमेत लिएका थिए । सेवाग्राहीले सेवा पाउन निकै खर्चिलो र झन्झटिलो भएको प्रतिक्रिया दिए । मन्त्रीले कार्यालय अनुगमनपछि कार्यालय प्रमुखको कार्यकक्षमै कर्मचारीलाई घुस खाएर काम नगर्न चेतावनी दिए । जनतालाई छिटो–छरितो र सरकारले तोकेको राजस्व रकम लिएर सेवा प्रदान गर्न मन्त्री दाहालले कर्मचारीसँग आग्रह गरे ।

यातायात कार्यालयले दिने सेवा–सुविधाप्रति जनगुनासो आएपछि छड्के अनुगमनमा आएको बताउँदै मन्त्री दाहालले जनताले पाउनुपर्ने सेवा–सुविधामा आर्थिक चलखेल भएको जानकारी पाउनासाथ कारबाही गर्ने चेतावनी दिए ।

यातायात कार्यालयका कर्मचारीले लाइसेन्स नवीकरण, बाटो इजाजत र जाँचपासमा घुस खाने गरेको र रकम नदिँदा काम ढिलासुस्ती गर्ने जनगुनासो बढेपछि मन्त्री दाहालले छड्के अनुगमन गरेको बताए ।

भरतपुर यातायात सेवा कार्यालय प्रमुख विनोद पौडेलले रातदिन नागरिकको सेवा गरिरहेको दाबी गरे । उनले भने,‘कार्यालय सडक छेउमै छ । यहाँ आउने सेवाग्राहीका सवारी सडकसम्मै पार्किङ भइरहेका छन् । छिटो सेवा विस्तार गर्ने व्यवस्था मिलाइदिन मन्त्रीसँग आग्रह गर्छु ।’