भदौ २५, २०८१
बैशाख २७, २०७८
पाल्पा– कोरोनाको दोस्रो लहरमा संक्रमण दर बढेसँगै तानसेनका होटलहरूमा आइसोलेसन सेवा दिन व्यवसायी तयार भएका छन् ।
जिल्ला कोरोना नियन्त्रण तथा रोकथाम समितिले होटलहरूलाई आइसोलेसन बनाउन आग्रह गरेसँगै होटल व्यवसायीहरूले पहलकदमी थालेका हुन् ।
२ सातामा ६ सयको संख्यामा कोरोना संक्रमित थपिए पनि तानसेन नगरपालिकाको सक्रियता शून्य भएकाले होटल व्यवसायी आइसोलेसन बनाउने तयारीमा लागेका हुन् ।
होटल व्यवसायीको बैठकको निर्णयअनुसार आइसोलेसनमा बसेकालाई २ पटक खाना, २ पटक खाजा, चिया, कफी र बिरामी आफैंले तातो पानी तताउन मिल्ने विद्युतीय जगको व्यवस्था गरिने मोनिका गेस्टहाउसका सञ्चालक जीवलाल सुवेदीले बताए ।
तर, होटलहरूले आइसोलेसनमा बस्नेका लागि तय गरेको मूल्य गरिब र असहायका लागि महँगो पर्छ । यसमा स्थानीय सरकार तानसेन नगरपालिका मौन छ ।
अन्य स्थानीय सरकारले आइसोलेसन कक्ष निर्माण गरे पनि तानसेनले अझैसम्म बनाएको छैन । खाना र खाजासहित २ शय्याको कोठालाई प्रतिव्यक्ति प्रतिदिन २ हजार र कोठामा एक्लै बसे प्रतिदिन ३ हजार रुपैयाँ तिर्नुपर्नेछ । कोठा भाडामा बस्नेहरू, खाना बनाउने आफन्त नभएका र घरमा बस्न नमल्निेहरूलाई होटलको आइसोलेसनमा सहज हुने पाल्पा होटल तथा रेस्टुरेन्ट व्यवसायी समितिका अध्यक्ष मोहनप्रसाद श्रेष्ठले बताए ।
न्यूनतम मूल्यमा मानवीय सेवाका लागि आइसोलेसन बनाउने निर्णय गरिएको उनले जानकारी दिए ।
पहिलो चरणमा होटल श्रीनगर, होटल अन्नपूर्ण, मोनिका गेस्टहाउस, होटल सिम्रिक र होटल ताजले आइसोलेसन सञ्चालन गर्न सहमत भएका छन् । यी होटलमा ३ सय शय्या क्षमता रहेको छ ।
आइसोलेसनमा बस्नेका लागि एट्याच ट्वालेट बाथरुम, तातोपानी र आवश्यक परे अक्सिजनसमेत व्यवस्था गर्ने व्यसायीयले जनाएका छन् । स्थानीय सरकारले संक्रमितको ख्याल गर्न नसकेर घरमै बस्न सुझाएका बेला होटलको आइसोलेसनमा बस्न सक्नेका लागि राहत हुनेछ ।
कात्तिक १४, २०८१
