ताप्लेजुङ– ताप्लेजुङको सिदिङ्वा गाउँपालिकाले अध्यक्ष, उपाध्यक्ष तथा कार्यपालिका सदस्य निर्दिष्ट कार्यक्रममार्फत २५ लाख रुपैयाँका कार्यक्रम विनियोजन गरेको छ ।

कार्यपालिका सदस्य निर्दिष्ट कार्यक्रममार्फत १५ लाख र अध्यक्ष–उपाध्यक्ष निर्दिष्ट कार्यक्रममार्फत १० लाख गरी २५ लाख रुपैयाँका योजना छनोट गरेको निमित्त प्रमुख प्रशासकीय अधिकृत वीरेन्द्र सिग्देलले जानकारी दिए । 

अध्यक्ष–उपाध्यक्ष निर्दिष्ट कार्यक्रमबाट ३ वटा योजना छनोट भएका छन् । वडा नम्बर ७ सुरुम्खिमको खोपी तालखर्क–तिम्बुङ पोखरी मोटर बाटो निर्माणका लागि ५ लाख ५० हजार, वडा नम्बर ५ को अम्बिका आधारभूत विद्यालय चुम्बुङ लिम्बूदिन चेनगेट तथा सिँढी घेराबार १ लाख र वडा नम्बर १ कालीखोलाका पदम कार्कीको घरदेखि लोकुम्बा जाने मोटर बाटोका लागि ३ लाख ५० हजार रुपैयाँको योजना छनोट गरिएको छ ।

कार्यपालिका सदस्य निर्दिष्ट कार्यक्रममार्फत वडा नम्बर १ देखि वडा नम्बर ७ सम्मलाई खेलकुद प्रतियोगिता सञ्चालन वा खेल सामग्री खरिदका लागि प्रतिवडा ७० हजारका दरले ४ लाख ९० हजार, वडा नम्बर ३ आङ्खोपको सेमेन्चोङ भवनका लागि १ लाख ५० हजार र पालिकाभित्रका सबै वडाका १–१ जना युवा उद्यमीको भ्रमणका लागि १ लाख १० हजार रुपैयाँ विनियोजन गरिएको छ ।

यस्तै, वडा नम्बर १ कालीखोलाको जालपा आधारभूत विद्यालय, वडा नम्बर ५ लिम्बूदिनको जनता आधारभूत विद्यालय र वडा नम्बर ३ आङखोपको आङ्गेपा आधारभूत विद्यालयको फर्निचर निर्माण तथा वडा नम्बर ७ सुरुम्खिमको स्वास्थ्य चौकीको औषधी खरिदका लागि जनही ५० हजार रुपैयाँका दरले रकम विनियोजन गरिएको छ ।

वडा नम्बर २ सादेवाको सिंहेश्वरी माविको फर्निचर निर्माणका लागि १ लाख, वडा नम्बर ६ मेहेलेस्थित खुवा आधारभूत विद्यालयको घेराबारका लागि २ लाख ५० हजार, वडा नम्बर ६ मेहेलेका गुमानसिंहको घरदेखि खेक्लेबुङ जाने मोटर बाटो निर्माणमा सहयोग ५० हजार र वडा नम्बर ६ मेहलेकै महिला भवनदेखि मूल गल्ली जाने मोटर बाटो निर्माणका लागि १ लाख ५० हजार गरी १५ लाख रुपैयाँका योजना छनोट गरिएका छन् ।