भदौ २५, २०८१
पुस १८, २०७७
नवलपरासी– कोरोना महामारीका कारण गरिएको लकडाउनपछि बन्द भएका नवलपुरका होमस्टे (घरबास) विस्तारै सञ्चालनमा आउन थालेका छन् ।
पूर्वी नवलपरासीमा करिब १ दर्जन होमस्टे छन् । आदिवासी जनजाति बाहुल्य रहेको क्षेत्र र पर्यकटकीय दृष्टिकोणले महत्त्वपूर्ण मानिने क्षेत्रमा खालिएका होमस्टेले त्यस क्षेत्रको बासिन्दाका जीवनस्तर उकास्नमा सहयोग पुर्याउँदै आएको छ ।
नेपालकै उत्कृष्ट होमस्टेको रूपमा सूचीकृत पूर्वी नवलपरासीको कावासोती नगरपालिका वडा नम्बर १५ अमलटारीमा रहेको अमलटारी होमस्टे लकडाउनले बन्द भए पनि अहिले खुलेको छ ।
३१ घर थारु र बोटे समुदाय मिलेर खोलिएको अमलटारी होमस्टेमा लकडाउनपछि आन्तरिक तथा बाह्य पर्यटकका लागि खुला गरिएको होमस्टे सञ्चालक समितिले जनाएको छ ।
होमस्टेमा अहिले दैनिक २०–२५ जना पर्यटक आउन थालेको र ठूलो संख्यामा पर्यटक आए पनि सोही अवस्थामा तयारीमा राखिएको अमलटारी होमस्टेका व्यवस्थापक धनीराम चौधरी बताउँछन् ।
यहाँबाट चितवन राष्ट्रिय निकुञ्ज र आसपासका मध्यवर्ती क्षेत्रभित्रका सामुदायिक वनमा जंगल सफारी गर्न सकिने, गैँडा, बाघ, हरिण, चित्तल, वनहात्तीसमेत सजिलै अवलोकन गर्न सकिन्छ ।
अमलटारी होमस्टे विगतको तुलनामा फरक शैलीमा सञ्चालन गर्न अमलटारी होमस्टेललाई प्राकृतिक रूप दिइएको छ ।
अमलटारी होमस्टेमा एउटा पाहुना गएर कोठा खाली हुनासाथ कोठालाई सेनिटाइज गर्ने, बिछ्यौना परिवर्तन गर्नेलगायत काम गरिएको होमस्टेका अध्यक्ष एवं कावासोती नगरपालिकाका उपप्रमुख प्रेमशंकर मर्दनियाले जानकारी दिए । पूर्वी नवलपरासीको कावासोतीमा मात्रै ४ वटा होमस्टे सञ्चालनमा छन् भने नवलपुरमा १ दर्जन हाराहारी होमस्टे छन् ।
गरिब तथा विपन्न परिवारको जीवनस्तर उकास्न र यहाँका आदिवासी जनजातिको कला–संस्कृतिमार्फत पर्यटक भित्र्याउन नवलपुरका स्थानीय सरकारहरूले होमस्टेको सम्भाव्यता रहेका क्षेत्रका स्थानीयसँग सहकार्यमा गरिरहेका छन् । होमस्टे खोल्न र सञ्चालनका लागि प्रोत्साहनस्वरूप सञ्चालनको सुरुमा आर्थिक सहयोगसमेत गर्दै आएका छन् ।
कात्तिक १४, २०८१
